Azərbaycanın Ağdam rayonunun Sırxavənd kəndi (Bakıdan 333 kilometr qərb) ərazisində mina partlayışı baş verib.
Bu barədə Daxili İşlər Nazirliyi (DİN) və Minatəmizləmə Agentliyinin (ANAMA) məlumat yayıb.
Məlumatda deyilir ki, ANAMA-nın əməkdaşı Hasil Yusubov xidməti vəzifəsini yerinə yetirərkən piyada əleyhinə mina partlayışı baş verib. Hadisə nəticəsində onun sol ayağı topuq nahiyəsindən amputasiya olunub.
"Xəsarət alan əməkdaş rayon xəstəxanasına təxliyə edilib. Vəziyyəti qənaətbəxşdir", məlumatda qeyd edilib.
ANAMA-nın məlumatına görə, 1991-ci ildən bəri 3429 şəxs mina qurbanı olub ki, onların 358-i gənc və ya uşaq, 38-i qadındır.
2020-ci ildəki 44 günlük müharibədən sonrakı dövrdə isə ümumilikdə 362 nəfər azərbaycanlı mina qurbanına çevrilib. Onlardan 51 nəfər mülki şəxs, 15 nəfər hərbi qulluqçu olmaqla, 66 nəfər həlak olub.
Ekspertlərin fikrincə, ölkə ərazisində yüz minlərlə mina və ya partlamamış hərbi sursat qalıqları var.
Forum