Avropa Şurası Parlament Assambleyasının 20 deputatı “Azərbaycanda siyasi məhbusların sayının artması” haqqında qətnamənin qəbulunu təklif edib.
Bu barədə Avropa Şurası Parlament Assambleyasının saytında məlumat yayılıb.
“Azərbaycanda jurnalistlərə, hüquq müdafiəçilərinə və müxalifətçilərə qarşı təqiblərin artması, siyasi məhbusların sayının artması həyəcan doğurur,” 13 ölkədən olan 20 parlamentarinin imzaladığı sənəddə deyilir.
Təşəbbüsçü İtaliyadan olan deputat Mauritsio Bukkarelladır.
Sənəddə jurnalist Əvəz Zeynallı və hüquq müdafiəçisi Elçin Sadıqovun həbsi yada salınır. Hakimiyyət Avropa Şurasının insan hüquqları üzrə komissarı Dunya Miyatoviçin Zeynallı və Sadıqovu dərhal azad etmək çağırışına məhəl qoymayıb.
2022-ci ilin ortalarında bloger Abid Qafarov uydurma böhtan ittihamı ilə həbs edilib. Müxalifətçi Əli Əliyevə qarşı eyni ittihamla üç cinayət işi başlanıb.
2022-ci ilin mayında bloger Rəşad Ramazanov uydurma ittihamla həbs edilib.
“Parlament Assambleyası Azərbaycanda siyasi məhbuslarla bağlı işlərə diqqətlə baxmalı və öyrənməlidir,” sənəddə deyilir.
Petisiya müəllifləri hesab edirlər ki, Assambleya Azərbaycan hökumətini Avropa İnsan Hüquqları Konvensiyasına əməl etməyə və bütün siyasi məhbusları azad etməyə çağırmalıdır.
Qətnamə layihəsinin Avropa Şurası Parlament Assambleyasında müzakirəyə çıxarılacağı vaxt hələlik məlum deyil.
Azərbaycan hakimiyyəti ölkədə insanların iradəsinə görə təqib edilmədiyini və siyasi məhbusların olmadığını bildirir. Ölkə rəsmiləri Azərbaycanda bütün fundamental hüquqların, o cümlədən söz, toplsaşmaq, birləşmək azadlıqlarının tam təmin edildiyini bəyan edib.
Eyni zamanda, yerli hüquq müdafiə təşkilatları yüzdən çox insanı siyasi məhbus kimi tanıyır. Avropa Şurası Parlament Assambleyası 2021-ci ildə Azərbaycanda siyasi məhbuslar haqqında qətnamə qəbul edib. Bu qurumda Azərbaycanda siyasi məhbuslarla bağlı məruzəçi fəaliyyətdədir.
