Azər Qasımov: ABŞ-ın Azərbaycanda seçkilərlə bağlı bəyanatı qərəzli və qeyri-obyektivdir [Audio-Müsahibə]

Azərbaycan prezidentinin mətbuat katibi Azər Qasımov Amerikanın Səsinə müsahibəsində ABŞ Dövlət Departamentinin Azərbaycanda keçirilən prezident seçkiləri ilə bağlı bəyanatına münasibət bildirib.


Sual: Amerika Dövlət Departamentinin Azərbaycanda prezident seçkiləri ilə bağlı bəyanatına münasibətiniz necədir?

Cavab: Birmənalı şəkildə onu deyə bilərəm ki, qərəzli və qeyri-obyektiv bir sənəddir. Fikirlərimi ona əsasən deyirəm ki, bu sənəd əfsuslar olsun ki, yalnız ATƏT-in müşahidəçilər qrupunun rəyinə əsasən hazırlanıb.

Azərbaycanda seçkiləri müşahidə edən Avropa parlamenti, Avropa Şurası, İslam Əməkdaşlıq Təşkilatı, MDB müşahidəçilər missiyası və bir sıra digər təşkilatlar və ölkələrin rəyləri burada nəzərə alınmayıb.

Hətta, ABŞ-ın xeyli sayda senator və konqresləri də seçkilərin tam şəffaf keçirilməsi ilə bağlı öz fikirlərini söyləyiblər. Bütün bu rəylər nəzərə alınmadan hansısa bir qurumun və o qurumun ki, sənədləri məşvərətçi xarakter daşıyır, o qurum ancaq məsləhət, tövsiyə xarakterli təşkilatdır, ona əsaslanıb.

Onu da deyim ki, ABŞ-da keçirilən prezident seçkilərinə, ABŞ-da ümumiyyətlə seçki sisteminə nəzər salsaq, elə ABŞ Dövlət Departamentinin özü ki, ATƏT-ə istinad edib, ATƏT-in missiyasına istinad edib. Əgər ATƏT-in missiyasına biz də istinad etsək ABŞ-ın özündə prezident seçkilərində, ümumiyyətlə seçki sistemində çox ciddi problemlərin mövcud olduğunu görərik.

Bunun üçün ATƏT-in missiyalarının Amerikada seçkilərlə bağlı hazırladığı sənədləri görsək Amerikanın özünün seçki sistemində arxaik, mənən köhnəlmiş prosedurlar olduğunu görürük. Orada səsvermə sistemində hansı ciddi problemlərin olduğunu biz aydın görə bilərik.

Sual: Bu sənəd ikitərəfli münasibətlərə yenilik gətirə bilərmi?

Cavab: Mən yenilik deməzdim. Amma bu sənədin Azərbaycan ictimai rəyində çox kəskin mənfi reaksiya doğuracağını vurğulamaq istəyirəm.