Avqustun 16-17-də Rusiyanın Həştərxan şəhərində IX Xəzər Media Forumu keçirilib.
Tədbirdə Rusiya, Azərbaycan, İran, Qazaxıstan, Türkmənistan, həmçinin Qaqauziya və Özbəkistandan jurnalistlər, dövlət orqanlarının və ictimai təşkilatların nümayəndələri iştirak edib.
Bu barədə TASS agentliyi məlumat yayıb.
Rusiya Xarici İşlər Nazirliyinin xüsusi tapşırıqlar üzrə səfiri, Xəzər dənizi üzrə çoxtərəfli danışıqlarda Rusiya nümayəndə heyətinin rəhbəri Mixail Petrakov bildirib ki, Xəzər dənizində birbaşa baza xətlərinin yaradılması haqqında sazişin bağlanması beş dənizyanı ölkə arasında danışıqların əsasını təşkil edir.
Onun sözlərinə görə, bu, ölkələrə dövlət sərhədlərini və balıqçılıq zonalarını müəyyən etməyə imkan verəcək.
Bununla yanaşı Petrakov deyib ki, birgə saziş mürəkkəb məsələdir, çünki bir neçə dövlətin milli maraqları kəsişir: “Danışıqlar prosesinin təfərrüatlarını açıqlaya bilmərəm, lakin biz Xəzər dənizi məsələləri üzrə yüksək səviyyəli işçi qrupu çərçivəsində bu məsələ ilə bağlı kifayət qədər irəliləyiş əldə edə bilmişik”.
Petrakov qeyd edib ki, Xəzər gənc regiondur, 1991-ci ildə bu strukturda yeni dövlətlərin yaranması ilə formalaşıb. Beş dövlət - Azərbaycan, İran, Qazaxıstan, Rusiya və Türkmənistan Xəzər dənizində qarşılıqlı fəaliyyət məsələlərini müzakirə edir. 2018-ci ildə dövlətlər arasında qarşılıqlı fəaliyyət qaydalarını müəyyən edən ilk konvensiya imzalanıb.
Bu arada Rusiyanın Aşqabaddakı müvəqqəti işlər vəkili Pyotr Şukin bildirib ki, bu ilin sonunda Aşqabadda Xəzəryanı ölkələrin xarici işlər nazirlərinin müşavirəsinin keçirilməsi planlaşdırılır.
"Xəzər regionunun geostrateji, siyasi, resurs, nəqliyyat və iqtisadi potensialını nəzərə alsaq, onun Avrasiyanın mərkəzində yerləşən ən mühüm birləşdirici halqa kimi rolu yalnız artacaq. Xəzər regionunun bütün dövlətlərinin ərazisindən keçən və hazırda inkişafı istiqamətində işlərin fəal şəkildə aparıldığı "Şimal-Cənub" Beynəlxalq Nəqliyyat Dəhlizinin əhəmiyyəti də artmaqdadır", diplomat deyib.
Onun sözlərinə görə, bu günə qədər regional əməkdaşlığa dair 9 beştərəfli dövlətlərarası saziş və protokoldan ibarət sanballı hüquqi baza yaratmaq mümkün olub. Daha bir neçə sənəd isə işlənmə və ya ratifikasiya mərhələsindədir.
İranın Rusiyadakı səfiri Kazem Cəlali deyib ki, İran Rusiya ilə işləməkdə və Rusiya qazını öz ərazisi ilə nəql etməkdə maraqlıdır.
“Biz Rusiya ilə işləməkdə çox maraqlıyıq, biz Rusiya qazını İran ərazisi ilə nəql etməyə hazırıq”.
Cəlali aydınlaşdırıb ki, 2023-cü ildə Rusiya İrana xarici investisiyaların həcminə görə birinci yerdədir.
Forumun ideyası 2014-cü ildə beş Xəzəryanı dövlətin: Rusiya, Qazaxıstan, Azərbaycan, İran və Türkmənistanın iştirak etdiyi Xəzər Sammitində yaranıb. İlk Xəzər Media Forumu 2015-ci ildə Həştərxanda keçirilib. Forum zamanı Həştərxan vilayətində Xəzər redaksiyası və Xəzər ekspert klubu yaradılıb, həmçinin mütəmadi olaraq məlumat mübadiləsi aparılır.
Forum