Azərbaycanla İsrail arasında parlamentlərarası əlaqələrin gücləndirilməsi müzakirə edilib.
Bu barədə Azərbaycanın İsraildəki səfiri Muxtar Məmmədov Twitter hesabında məlumat yayıb.
Belə ki, Muxtar Məmmədov Knessetin deputatı və İsrail-Azərbaycan parlamentlərarası dostluq qrupunun sədri Vladimir Beliakla görüşüb.
Görüşdə ikitərəfli əlaqələri müzakirə olunub və əməkdaşlığın gücləndirilməsinin vacibliyi vurğulanıb.
Azərbaycan Milli Məclisi 2022-ci il noyabrın 19-da Azərbaycan hökumətinin İsraildə səfirlik açmasına razılıq verib.
Azərbaycan prezidenti İlham Əliyevin yanvarın 11-də imzaladığı sərəncamla Muxtar Məmmədov Azərbaycanın İsrail dövlətində fövqəladə və səlahiyyətli səfiri təyin edilib. Martın 26-da Muxtar Məmmədov etimadnaməsini İsrail Prezidenti İsxak Hersoqa təqdim edib.
Azərbaycanın İsraildə səfirlik açmaq qərarı çoxsaylı beynəlxalq qurumlar tərəfindən dəstəklənib. İsrail hökuməti Azərbaycanın Tel-Əvivdə səfirlik açmasını strateji müttəfiqlik əlaqələrinin gücləndirilməsinə işarə kimi qiymətləndirib.
Azərbaycanın İsraildə səfirlik açması barədə qərarı İran-Azərbaycan münasibətlərində gərginlik yaşandığı vaxta təsadüf edir. Anti-İsrail ideologiyasına əsaslanan mövcud İran hakimiyyəti bir qayda olaraq Azərbaycanın İsraillə münasibətlərinə tənqidi mövqe bəsləyib.
