Yanvarın 9-da Bakı Apellyasiya Məhkəməsi “Toplum TV işi” üzrə həbs edilmiş videoredaktor Müşfiq Cabbar, "Demokratik Təşəbbüslər İnstitutu”nun əməkdaşı Ramil Babayevin apellyasiya şikayətini təmin etməyib.
Həmçinin yanvarın 8-də Bakı Apellyasiya Məhkəməsi "Toplum TV işi” üzrə həbs edilmiş III Resblika Platformasının spikeri Akif Qurbanov və Demokratik Təşəbbüslər İnstitutunun əməkdaşı İlkin Əmrahovun həbs müddətinin daha 3 ay uzadılması barədə qərardan verilən apellyasiya şikayətini təmin etməyib.
Birinci instanisya məhkəməsinin onlar barədə qərar qüvvədə qalıb.
Müşfiq Cabbarın vəkili Nazim Musayevin verdiyi məlumata görə, Cabbarın həbsdə saxlanılması üçün heç bir maddi və prosessual əsas yoxdur.
Onun sözlərinə görə, Müşfiq Cabbarın ona qarşı irəli sürülmüş "xarici valyuta qaçaqmalçılığı" ittihamı ilə heç bir əlaqəsi yoxdur.
Səhhətində ciddi problemlər olmasına baxmayaraq, Toplum TV-nin təsisçisi Ələsgər Məmmədlinin şikayəti də təmin edilməyib.
Növbəti günlərdə bu işin daha iki fiqurantının - III Respublika Platformasının üzvü Ruslan İzzətlinin və Toplum TV-nin jurnalisti Əli Zeynalovun apellyasiya şikayətlərinə baxılacaq.
Dekabrın 28-də Xətai Rayon Məhkəməsində “Toplum TV işi” üzrə saxlanılan “III Respublika Platforması”nın spikeri Akif Qurbanov, qurumun qurucu heyət üzvü Ruslan İzzətli, “Toplum TV”nin təsisçisi Ələsgər Məmmədli, videoredaktor Müşfiq Cabbar, “Demokratik Təşəbbüslər İnstitutu”nun əməkdaşları Əli Zeynal, İlkin Əmrahov və Ramil Babayev haqqındakı həbs müddəti daha 3 ay - aprelin 6-dək uzadılıb.
Hər bir məhkəmə iclasında Bakı Şəhər Baş Polis İdarəsinin müstəntiqi təqdimatı müdafiə edib, təmin olunmasını istəyib.
Müstəntiq bildirib ki, istintaq davam edir, bu müddətdə təqsirləndirilən şəxslərin həbsdən buraxılması istintaqın gedişinə mane ola bilər.
Vəkillər və təqsirləndirilən şəxslər təqdimata etiraz edib, lakin müdafiə tərəfinin arqumentlərinin nəticəsi olmayıb.
"Toplum TV işi" üzrə nə baş verib?
Martın 6-da hüquq-mühafizə orqanları "Toplum TV", "Demokratik Təşəbbüslər İnstitutu", həmçinin "III Respublika Platforması"nın ofislərində, bir neçə əməkdaşın evində axtarış aparıb. Məlumata görə, iyirmidən çox əməkdaş polis tərəfindən saxlanılıb, bir neçə saat sonra əməkdaşların əksəriyyəti sərbəst buraxılıb. Lakin "Toplum TV"nin ofisinin qapısı möhürlənib. "Toplum TV"nin jurnalistləri Fərid İsmayılova (polisin nəzarətinə verilməklə ev dustaqlığı qətimkanim tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı qətimkan tədbiri seçilib) və "Demokratik Təşəbbüslər İnstitutu"nun rəhbəri, həmçinin "III Respublika Platforması"nın spikeri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs qətimkan tədbiri seçilib.
Martın 8-də "III Respublika Platforması"nın qurucu heyət üzvü Ruslan İzzətli və "Toplum TV"nin həmtəsisçisi Ələsgər Məmmədli həbs olunub. Xətai Rayon Məhkəməsi onlar barəsində 4 aylıq həbs qətimkan tədbiri seçib. Hər ikisi də qaçaqmalçılıqda ittiham olunur.
Bu ilin iyul ayında bütün həbs olunanların həbs qətimkan tədbiri daha 3 ay uzadılıb.
Beynəlxalq media müdafiə təşkilatları Azərbaycan hakimiyyətini saxlanan jurnalistləri dərhal azad etməyə, müstəqil mediaya təzyiqləri dayandırmağa çağırıb.
Dövlət rəsmiləri bir qayda olaraq insanların qanun qarşısında bərabər olduğunu, iradəsinə görə təqib edilmədiyini bəyan edir.