Xocavənd rayonunda (Bakıdan 390 kilometr cənub-qərb) mülki şəxs Rasif Kərimzadə minaya düşərək xəsarət alıb.
Baş Prokurorluğun Mətbuat xidmətinin məlumatına görə, oktyabrın 2-də Xocavənd rayonunun azad edilmiş Tağaverd kəndi ərazisində təmir tikinti işləri aparılan zaman fəhlə kimi çalışan Rasif Kərimzadənin minaya düşməsi nəticəsində müxtəlif dərəcəli bədən xəsarətləri alması müəyyən edilib.
Xatırladaq ki, bundan öncə sentyabrın 30-da Azərbaycanın Füzuli (Bakıdan 310 kilometr cənub-qərb və Tərtər (Bakıdan 332 kilometr qərb) rayonlarında 4 nəfər mülki şəxs minaya düşüb. Onlardan ikisi həlak olub.
Rəsmi məlumatlara görə, Ermənistan və Azərbaycan arasında 30 illik münaqişədə döyüş əməliyyatlarının dayandırılması ilə bağlı Azərbaycan, Ermənistan və Rusiya liderlərinin imzaladığı 2020-ci il 10 noyabr tarixli bəyanatdan sonra həmin ərazilərdə minaya düşmələri nəticəsində 28 mülki şəxs, 7 hərbi qulluqçu həlak olub, 97 hərbi qulluqçu, 52 mülki şəxs müxtəlif dərəcəli bədən xəsarətləri alıb.
Rəsmi statistikaya görə, ümumilikdə 2020-ci il də daxil olmaqla, Azərbaycanda 2439 nəfər müharibənin təhlükəli partlayıcı qalıqlarından zərər çəkib, onlardan 383 nəfər ölüb və 2056 nəfər yaralanıb.
Azərbaycanın azad edilmiş ərazisində hazırda ermənilər yaşayan hissədə Rusiya Müdafiə Nazirliyi, azərbaycanıların yaşadığı hissədə Azərbaycan Minatəmizləmə Agentliyi, Azərbaycan, Rusiya və Türkiyə hərbi istehkamçıları minatəmizləmə işlərini həyata keçirir.
Ekspertlərin fikrincə, bu ərazilərdə yüz minlərlə mina var.
