Mayın 13-də Bakının Xətai Rayon Məhkəməsi hakim Sahibə Hacıyevanın sədrliyi ilə “Turan” agentliyinin iqtisadi xəbərlər departamentinin redaktoru Hafiz Babalanın “İki sahil” qəzetinə qarşı qaldırdığı iddianı təmin etməyib.
Babalanın “Qafqazinfo.az” saytına qarşı qaldırdığı analoji iddia üzrə məhkəmə prosesindən fərqli olaraq, bu dəfə jurnalistin özü prosesdə iştirak etməyib və istintaq təcridxanasından videobağlantı vasitəsilə əlaqə yaradılıb.
İddia 2023-cü il dekabrın 28-də “Hafiz Babalanın işində yeni təfərrüatlar” yazısının dərci ilə bağlı qaldırılıb.
Vəkil Rəsul Cəfərov bildirib ki, məqalədə Babalanın araşdırmaçı jurnalist kimi şərəf, ləyaqət və işgüzar nüfuzuna xələl gətirən böhtan xarakterli məlumatlar yer alıb.
Məqalədə xüsusilə qeyd olunur ki, “Babalı qrant layihələri ilə bağlı xarici təşkilat və fondlarla əlaqə yaradaraq, onların sifarişi ilə araşdırmalar aparıb, məqalələr hazırlayıb”.
“Avropadakı azərbaycanlı siyasi mühacirlərin də Hafiz Babalanın iştirakı ilə həyata keçirilən layihələrə cəlb olunması” ifadəsi də böhtan kimi qiymətləndirilib”.
Vəkil qeyd edib ki, jurnalistə qarşı irəli sürülən ittihamlar əsassızdır və bu, media qurumunun məsuliyyətinə səbəb olur. Cəfərov eyni zamanda deyib ki, Babalıya qarşı ittihamlar dövlət qurumlarının və digər rəsmi mənbələrin, eləcə də informasiya agentliklərinin məlumatlarından götürülmədiyi üçün “İki sahil” məsuliyyətdən azad edilə bilməz.
Hafiz Babalının özü bildirib ki, qəzetin redaktorları ondan media haqqında qanunun tələb etdiyi rəyi soruşmayıb. O, həmçinin qeyd edib ki, onun korrupsiyaya qarşı apardığı araşdırmaların obyekti yüksək vəzifəli məmurlar, deputatlar, məmurlar olub və heç kim heç vaxt iddia qaldırmayıb, təkzib tələb etməyib, onu məhkəməyə verməyib.
O, redaksiya tərəfindən onun təqsirsizlik prezumpsiyasını pozduğuna da diqqət çəkib. Babalı məhkəmədən böhtan xarakterli fikirləri təkzib etmək, ondan üzr istəmək və 9900 manat təzminat ödəmək üçün nəşrin üzərinə öhdəlik qoyulmasını, məhkəmə xərclərini isə redaktorların üzərinə qoyulmasını xahiş edib.
“İki sahil” qəzetinin nümayəndəsi isə ümumiyyətlə məhkəməyə gəlməyib. Bu qəzetin nümayəndəsi məhkəmənin hazırlıq iclasında bildirib ki, qəzetdə dərc edilən yazı digər media oraqnından götürülüb.
Bu zaman vəkil digər media orqanından götürülərək dərc edilən yazının həmin medianı məsuliyyətdən azad etmdiyini yada salıb.
Hakim Hacıyeva iddianı təmin etməyib. Hakim hansı səbəbdən bu qərara gəldiyini izah etmədən məhkəmə zalını tərk edib.
Qeyd edək ki, Babalı Qafqazinfo.az saytına və ATV telekanalına qarşı da analoji iddialar qaldırıb. ATV-yə qarşı iddia nəticəsiz qalıb. Qafqazinfo.az-a qarşı proses davam edir.
Hafiz Babalı dekabrın 13-də saxlanılıb. O, “xarici valyuta qaçaqmalçılığı” maddəsi ilə ittiham olunub. Məhkəmənin qərarı ilə onun barəsində 3 ay müddətinə həbs qətimkan tədbiri seçilib. Babalı “Abzas Media işi” üzrə ittiham olunub. Hüquq müdafiəçiləri Babalını siyasi məhbus kimi tanıyıb.
Forum