ABŞ-ın Bakıdakı səfirliyi Amerikanın Səsinin ABŞ Dövlət Departamentinin Qafqaz danışıqları üzrə baş müşaviri Lui Bononun Bakıya səfərinin mümkünlüyü ilə bağlı sorğusuna cavab olaraq bildirib ki, Bono sülh prosesini dəstəkləmək üçün Ermənistan və Azərbaycanda maraqlı tərəflərlə müntəzəm olaraq danışıq aparır.
Səfirlik qeyd edib ki, Qafqaz danışıqları üzrə baş məsləhətçi ABŞ-ın sülh prosesinə dəstəyini, davamlı ədalətli sülhə nail olmağın yollarını müzakirə etmək üçün tez-tez regiona səfərlər edir.
"Elan etmək üçün heç bir təfərrüatımız yoxdur. Cənab Bono sülh prosesini dəstəkləmək üçün Ermənistan və Azərbaycanda bir neçə əsas maraqlı tərəflə müntəzəm olaraq danışıq aparır. Biz Cənubi Qafqaz xalqlarına sülh və sabitlik gətirəcək istənilən prosesə kömək etməyə hazırıq" - deyə, səfirlikdən bildirilib.
Yanvarın 8-də ABŞ Dövlət Departamentinin Qafqaz danışıqları üzrə baş müşaviri Lui Bono Yerevana səfər edib.
Bu barədə Ermənistan Təhlükəsizlik Şurasının katibi Armen Qriqoryan Facebook hesabında bildirib.
“Biz Ermənistan-Azərbaycan münasibətlərinin nizamlanması prosesini, son danışıqlar və bu çərçivədə əldə olunmuş razılaşmaların həyata keçirilməsini müzakirə etdik.
Mən bir daha Ermənistan tərəfinin regionda uzunmüddətli və hərtərəfli sülhün bərqərar olmasına sadiqliyini təsdiqlədim”, Ermənistan Təhlükəsizlik Şurasının katibi sosial şəbəkə hesabında bildirib.
ABŞ Dövlət Departamentinin sözçüsü Metyu Miller yanvarın 4-də keçirilən ənənəvi brifinqdə Turan agentliyinin Rusiyanın regiondan kənarda olan dövlətlərin Azərbaycan-Ermənistan probleminin həllinə qarışmaması barədə çağırışı ilə bağlı sualının cavabında deyib ki, Rusiya heç bir halda ABŞ-ın Azərbaycan-Ermənistan münasibətlərinin normallaşması istiqamətində mühüm diplomatik səylər göstərməsinə mane olmur.
“Rusiya Ermənistan və Azərbaycan üçün zəruri hesab etdiyimiz mühüm diplomatik səyləri həyata keçirməyə heç bir şəkildə mane olmur və biz onları həyata keçirməyə davam edəcəyik”, Miller qeyd edib.
Azərbaycan və Ermənistan xarici işlər nazirlərinin ABŞ-da növbəti görüşünə gəlincə, Miller deyib ki, görüş təyin olunanda Vaşinqton bu məsələ ilə bağlı açıqlama verəcək.
Yanvarın 1-də Azərbaycan Prezidentinin köməkçisi Hikmət Hacıyev Almaniyanın Berliner Zeitung qəzetində dərc olunmuş müsahibədə bildirib ki, Azərbaycan və Ermənistan vasitəçisiz məhsuldar danışıqlar aparmağa qadirdir.
Hacıyev Azərbaycanın təcrübəsində Azərbaycan-Ermənistan danışıqlarında İran, Rusiya və Türkiyə ilə 3+3 formatı, yoxsa Qərbin, ABŞ, Avropa İttifaqının iştirakı ilə danışıların effektİi olub-olmaması barədə suala belə cavab verib.
“Hər bir formatın öz üstünlükləri var. Müxtəlif mərhələlərdə bütün formatlar tərəqqiyə səbəb olub. Biz bütün vasitəçilərə də minnətdarıq. Yer önəmli deyil, nəticə önəmlidir. Məqsədimiz nəticəyönümlü danışıqlardır. Prinsipcə biz dürüst vasitəçiliyin əleyhinə deyilik, lakin birbaşa müzakirələrə üstünlük veririk. Müvafiq olaraq, Bakı ilə Yerevan arasında sülh sazişinin mətni birbaşa və ikitərəfli qaydada hazırlanacaq,” o deyib.
Forum