Cümə günü, Noyabr ayının 4-də Azərbaycanın Təbrizdəki baş konsulluğu qarşısında Ənsarı Hizbullah təşkilatının aksiya keçirəcəyi barədə Azərbaycan mətbuatında çıxan məlumatlar təşkilatın Şərqi Azərbaycan şöbəsinin saytında təkzib edilib.
Bu təkzib cüməaxşamı günü Təbriz Ənsari Hizbullahının mühüm açıqlaması olaraq saytda birinci xəbər kimi yayımlanıb. Saytda cüməaxşamı günü yazılıb:
“Möhtərəm Hizbullahi bacı və qardaşlarımıza çatdırırıq ki, Aban ayının 13-ü (Noyabrın 4-ü) Azərbaycanın baş konsulluğunun önündə nümayiş keçiriləcəyi barədə şaiələr yayılıb. Bu təşkilat belə bir aksiya keçirtməyəcəkdir və Hizbullah bu barədə yayılan şaiəni təkzib edir. “
Qeyd edək ki, Noyabrın 4-ü İranda Amerika səfirliyinə edilən hücumun il dönümüdür və həmin gün İranda tələbə günü olaraq qeyd edilir.
Bu arada Ənsarı Hizbullahın Şərqi Azərbaycan şöbəsinin rəhbəri molla Ruhulla Becaninin Səhər televiziyasında və internetdə Azərbaycan əleyhinə çıxışları təşkilatın saytında qalır. O çıxışlarında Azərbaycan rəhbərlərinə qarşı təhkir mahiyyətində ifadələr işlədir xalqı din adına üsyana çağırır, İslam Partiyasının sədri Möhsün Səmədov və partiyanın digər bəzi üzvllərinin həbsini pisləyir.
Molla Becani həmin sayta yerləşdirilmiş və səhər televiziyasında dediyi sözləri təkrar edərək Azərbaycanda Dini Qurumlarla İş Üzrə Dövət Komitəsinin, Azərbaycan rəhbərliyi tərəfindən Amerika və İsrailin tələbi üzərinə islama qarşı yarandığını da irəli sürüb. Azərbaycanın dünyadakı ikinci şiə dövləti olduğunu deyən Molla Becani belə bir iddia da irəli sürüb ki, bu idarə islamı azərbaycandan söküb atmaq məqsədi ilə yaranıb.
Ənsarı Hizbullahın Şərqi Azərbaycan şöbəsinin rəhbəri Azərbaycanın konsulluğunu casusxana adlandırıb və İran hökumətinin keçən il onların buraya hücum etmə planlarının qarşısını aldığını deyib. O söyləyib ki, biz bu il burada aksiyamızı keçirəcəyik.
Birdə xatırladaq ki, Ənsarı Hizbullahın Şərqi Azərbaycan Şöbəsinin saytında təşkilat Təbrizdə, Azərbycanın baş konsulluğu qarşısında nümayiş keçirəcəyi barədə xəbərləri təkzib edib və bu barədə şaiələrin əsası olmadığını bildirib.