Dövlət Departamenti: ATƏT-n gündəliyində münaqişələrin həlli üzrə real addımlar əsas yer tutmalıdır

ATƏT-in gündəliyində həlli uzadılmış münaqişələrin həlli üzrə konkret və real addımlar əsas yer tutmalıdır. Bu barədə dekabrın 13-də ABŞ Dövlət Departamentinin saytında dərc olunmuş bəyanatda deyilir.

Sənəddə bildirilib ki, təşkilat bundan sonra da həlli uzadılmış münaqişələrin həllində rol oynamaqda davam etməlidir.

Azərbaycan və Ermənistanın xarici işlər nazirləri Kiyevdə Dağlıq Qarabağ münaqişəsinin nizamlanması üzrə dialoqu davam etdirmək üçün görüşüb, ABŞ, Rusiya və Fransanın nümayəndə heyətlərinin rəhbərləri ilə birgə bəyanat veriblər. Həmin bəyanat ATƏT-in Nazirlər Şurası tərəfindən bəyənilib.

Bəyanatda deyilir ki, bu görüşlər münaqişənin sülh yolu ilə nizamlanması üzrə irəliləyişə nail olunmasında ümidverici amildir.