Meydan TV-nin həbs edilən jurnalisti Xəyalə Ağayevanın ev dustaqlığına buraxılması ilə bağlı vəsatət təmin edilməyib.
Bu barədə yanvarın 14-də Xətai Rayon Məhkəməsində hakim Sülhanə Hacıyevanın sədrliyi ilə keçirilən məhkəmə prosesində qərar verilib.
Vəkil Nazim Musayevin sözlərinə görə, məhkəmə prosesində jurnalistin özü də iştirak edib.
Jurnalistin vəkili məhkəmədə qeyd edib ki, Xəyalə Ağayeva 40 gündür heç bir sübut-dəlil olmadan həbsdə saxlanılır.
“Əgər Xəyalə Ağayeva gömrük orqanlarında işləsəydi və milyonlarla pula sahib olsaydı, hazırda azadlıqda olardı. Ancaq onun bütün var-dövləti qələmi, dili, hazırladığı sujetlərdir. Ona görə də hazırda həbsdədir”, vəkil bildirib.
Müstəntiq Nicat Osmanovun iştirakı ilə keçirilən prosesdə hakim Sülhanə Hacıyeva müdafiə tərəfinin vəsasətini təmin etməyib.
Jurnalistin vəkilləri qərardan apellyasiya şikayəti verəcəklərini bildiriblər.
Bu iş üzrə həbs edilən digər jurnalistlərin vəkilləri də onların ev dustaqlığına buraxılması ilə bağlı vəsatətlər verib. Bu vəsatətlərə ayrı-ayrı vaxtlarda baxılacaq.
Dekabrın 13-də Bakı Apellyasiya Məhkəməsi “Meydan TV”nin jurnalistləri barəsində həbs qətimkan tədbirinin seçilməsi ilə bağlı məhkəmə qərarından verilən şikayətləri təmin etməyib.
Apellyasiya şikayətlərində qərarın ləğv edilməsi və jurnalistlərin həbsdən azad edilməsi və ya ev dustaqlığına buraxılması göstərilib.
Dekabrın 8-də Bakının Xətai Rayon Məhkəməsi “Meydan TV”nin baş redaktoru Aynur Elgünəş (Qənbərova), saytın əməkdaşları Aytac Tapdıq (Əhmədova), Natiq Cavadlı, Xəyalə Ağayeva, Aysel Umudova, müstəqil jurnalist Ramin Deko, media əməkdaşı Ülvi Tahirov barəsində 4 aylıq həbs qətimkan tədbiri seçib.
Jurnalistlər Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə təqsirli bilinir.
“Meydan TV” jurnalistlərin saxlanılmasının və dindirilməsinin qeyri-qanuni olduğunu bildirib.
“Fəaliyyətə başladığımız gündən jurnalistlərimiz həbs edilib, özləri və ailələri təqiblərə məruz qalıb, onlara müxtəlif təzyiq və təhdidlər olub. Bizimlə əməkdaşlıq edən jurnalistlərin ölkədən çıxışına qanunsuz şəkildə qadağa qoyulub”, bəyanatda qeyd edilib.
“Meydan TV” 2013-cü ildə yaradılıb və Azərbaycanda baş verən hadisələri tərəfsiz, obyektiv yayan media qurumu olduğunu bəyan edib.
Media müstəqil fəaliyyət göstərdiyi müddətdə zaman-zaman hakimiyyətin təzyiqləri ilə üzləşib.
2015-ci ildə “Meydan TV” haqqında cinayət işi açılıb, əməkdaşı Şirin Tire (Abbasov) 30 sutka həbs olunub, kanalla əməkdaşlıq edən jurnalistlərin ölkədən çıxışına qadağa qoyulub.
Avropa Məhkəməsinin qərarı ilə hökumətin jurnalistlərə qoyduğu ölkədən çıxış qadağası qanunsuz sayıldığına görə Azərbaycan hökuməti 2019-cu ildə bu qadağanı aradan qaldırmağa məcbur olub.
2017-ci ildə ölkə ərazisində “Meydan TV”nin saytına blok qoyulub. Kanalın sosial şəbəkələrdəki hesabı dəfələrlə kiberhücum olunub, materialları silinib.
2021-ci ildə OCCRP-nin yaydığı araşdırma zamanı məlum olub ki, hökumət İsrailin NSO şirkətinin köməyi ilə kanalla əməkdaşlıq edən şəxslərin telefonlarını dinləyib.
Forum