Dağlıq Qarabağda Azərbaycan hərbçiləri ilə ermənilər arasında silahlı insident qeydə alınıb. Hər iki tərəfdən ölənlər və yaralananlar var.
Azərbaycan Müdafiə Nazirliyinin Mətbuat xidmətinin məlumatına görə, Xankəndi-Xəlfəli-Turşsu torpaq yolundan istifadə edilməklə Ermənistandan hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınmasının həyata keçirilməsi barədə operativ məlumatlar daxil olub.
"Martın 5-də səhər saatlarında daxil olmuş məlumatın yoxlanması məqsədilə qanunsuz hərbi daşınmalar həyata keçirən nəqliyyat vasitələrinin Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib. Qarşı tərəfdən atəş açılıb və baş vermiş atışma nəticəsində hər iki tərəfdən həlak olan və yaralananlar var", məlumatda qeyd edilir.
Azərbaycan tərəfi Rusiya sülhməramlı kontingentinin komandanlığının diqqətinə çatdırır ki, üçtərəfli Bəyanatın bəndlərinin yerinə yetirilməsi qeyd-şərtsiz və tam təmin edilməlidir.
"Bildiririk ki, Qarabağ iqtisadi rayonu ilə Ermənistan arasında yeganə istifadə oluna biləcək avtomobil yolu Xankəndi-Laçın yoludur. Rusiya sülhməramlı kontingentinin komandanlığına bir daha xatırladırıq ki, başqa marşrutlar üzrə hərbi və digər təyinatlı daşınmaların həyata keçirilməsi qəti surətdə yolverilməzdir. Xatırladırıq ki, Ermənistandan Qarabağ iqtisadi rayonuna silah-sursat, digər hərbi təchizat, o cümlədən minalar, yanacaq və canlı qüvvənin daşınması faktları bundan əvvəl də müəyyən olunmuşdur. Qeyd olunan marşrut üzrə minaların daşınması ilə əlaqədar Azərbaycan tərəfi dəfələrlə beynəlxalq ictimaiyyəti xəbərdar etmişdir. Əlavə olaraq bildiririk ki, 2022-ci ildə Türkiyə-Rusiya Birgə Monitorinq Mərkəzinin nümayəndələrinin Ermənistan tərəfindən basdırılan və sonradan aşkar edilən minalara baxış üçün əraziyə səfərləri də təşkil edilmişdir", Müdafiə Nazirliyi qeyd edir.
Nazirlik bildirir ki, bu gün baş vermiş insident bir daha Azərbaycan tərəfindən Laçın-Xankəndi yolunun üzərində müvafiq nəzarət-keçid məntəqəsinin yaradılmasının zəruri olduğunu göstərir.
"Ermənistanın yenə də Azərbaycanın Qarabağ iqtisadi rayonuna hərbi daşınmaları hayata keçirməsi faktı bu ölkənin Azərbaycana qarşı davam edən təcavüzü və terror siyasətidir. Törədilmiş təxribata görə bütün məsuliyyət Ermənistan hərbi-siyasi rəhbərliyinin üzərinə düşür", Müdafiə Nazirliyi bəyan edir.
Öz növbəsaində özünü Artsax (Qarabağ) Daxili İşlər Nazirliyi kimi təqdim edən qurumun məlumatına görə, azərbaycanlıların müdaxiləsi nəticəsində üç polis əməkdaşı həlak olub.
"Bu gün Xəlfəli adlanan ərazidə Azərbaycan silahlı qüvvələrinin diversiya qrupu polisin pasport-viza şöbəsinin növbətçi maşınına atəş açıb. Təxribat nəticəsində 3 polis əməkdaşı, polkovnik-leytenant Armen Babayan, mayor David Danielyan, leytenant Ararat Qasparyan həlak olub. Digər zabit, leytenant David Hovsepyan isə döş qəfəsindən güllə yarası alıb və o, Respublika Tibb Mərkəzinə yerləşdirlib", məlumatda qeyd edilir.
