İstanbul Universitetinin doktorantı Fazil Qasımov artıq 92 gündür aclığı davam etdirir. O, “qanunsuz həbsinə” etiraz edir.
Bu barədə onun qardaşı Nazim Qasımov Amerikanın Səsinə bildirib.
Nazim Qasımovun sözlərinə görə, sentyabrın 13-də qardaşı ilə Penitensiar Xidmətin Müalicə Müəssisəsində görüşüb.
Onun sözlərinə görə, Fazil Qasımovun vəziyyəti hər gün pisləşir.
“O, çəlikdən yapışaraq çətinliklə yeriyə bilirdi. Fazilin çəkisi iki dəfə azalıb. O, şiddətli baş ağrıları keçirir. Onun daxili orqanları ağrıyır. Fazil gözlərinin qaraldığını dedi. Penitensiar müəssisə əməkdaşlarının nəzarəti altında əlaqə saxladıq”, - deyə Nazim Qasımov bildirib.
Qardaşı vurğulayıb ki, Fazil Qasımov heç bir cinayət törətmədiyi üçün ona qarşı irəli sürülən bütün ittihamların götürülməsini tələb edir.
“Fazil Qasımov BMT-nin Bakı ofisinin və Beynəlxalq Qızıl Xaç Komitəsinin nümayəndələrinin ona baş çəkməsini istəyib”, Nazim Qasımov bildirib.
Bununla yanaşı, Fazil Qasımovun səhhəti ilə bağlı Penitensiar Xidmətin Müalicə müəssisəsindən münasibət öyrənmək mümkün olmayıb.
1 saylı Bakı İstintaq Təcridxanasının sanitar-tibb hissəsində saxlanılan Fazil Qasımovun iyulun 26-a keçən gecə aclıq etməsi ilə bağlı səhhəti kəskin pisləşdiyindən Penitensiar Xidmətin Müalicə müəssisəsinə köçürülüb.
Fazil Qasımov Qafqaz Universitetini bitirib (2017-ci il yanvarın 16-da fəaliyyətini dayandırıb), sonra Türkiyədə oxuyub, daha sonra İstanbul Universitetinin doktoranturasını bitirib.
Türkiyədə yaşayan Qasımov 2023-cü il avqustun 8-də İstanbulda tutularaq Azərbaycana gətirilib. Fazil Qasımov Qubad İbadoğluna qarşı qaldırılmış cinayət işinin istintaqı çərçivəsində saxlanılıb və Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə) maddəsi ilə ittiham olunur.
O, iqtisad elmləri doktoru Qubad İbadoğlu ilə ünsiyyətinin 2020-ci ilin mart ayında virtual formada yarandığını bildirib.
"Təhsil Fondu (AYEF) Böyük Britaniyanın Xeyriyyə Komissiyası tərəfindən qeydiyyata alındıqdan 23 gün sonra Qubad İbadoğlu, 39 gün sonra mən həbs edildim", Qasımov əlavə edib.
Azərbaycan Cinayət Məcəlləsinin 204.3.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma - eyni əməllər mütəşəkkil dəstə tərəfindən törədildikdə), 167-3.1-ci (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma) maddələri ilə ittiham olunan Qubad İbadoğlu ötən ilin iyulunda həbs edilib və bu il aprelin 22-ə qədər həbsdə qalıb.
Çoxsaylı yerli və beynəlxalq çağırışlardan sonra aprelin 22-də İbadoğlunun həbsi ev dustaqlığı tədbiri ilə əvəz edilib.
Mayın 21-də isə ev dustaqlığı müstəntiqin qərarı ilə polisin nəzarətinə verilmə ilə əvəz olunub və iş üzrə istintaqın müddəti daha 3 ay (avqustun 20-dək) uzadılıb.
İbadoğlu ona qarşı ittihamların əsassız və siyasi olduğunu, fəaliyyətinə görə cəzalandırıldığını qeyd edir.
Hazırda Fazil Qasımovun cinayət işi Qubad İbadoğlunun cinayət işindən ayrı icraata götürülüb. Bakı Ağır Cinayətlər Məhkəməsində hakim Mahirə Kərimovanın sədrliyi ilə Fazil Qasımovun cinayət işi üzrə məhkəmə prosesi davam edir.