ABŞ səfiri Mark Libbi mayın 9-da “Baker Hughes” Azərbaycan şirkətinə baş çəkərək ölkə nümayəndəsi Zaur Allahverdizadə və digər rəhbər şəxslər ilə görüşüb.
ABŞ səfirlıyinin məlumatında deyilir ki, ABŞ şirkəti və neft-qaz avadanlığı və xidmətlərinin əsas tədarükçüsü olan “Baker Hughes” Azərbaycan şirkətində 300-dən çox işçi çalışır və SOCAR Upstream ilə sıx əməkdaşlıq edir.
“Səfir Libbi “Baker Hughes”un yaşıl enerji təşəbbüsləri, müxtəliflik və inklüzivlik siyasəti haqqında məlumat əldə edib. O, yaşıl enerji üçün tənzimləyici çərçivənin vacibliyini qeyd edib və ABŞ şirkətlərinin Azərbaycanın bərpa olunan enerji sektoruna, o cümlədən COP29-da iştirakına marağını vurğulayıb”, səfirliyin X Platformasında qeyd edilir.
Baker Hughes Company Texas ştatının Hyuston şəhərində yerləşən Amerika enerji şirkətidir. Dünyanın ən böyük neft-mədən xidmətləri şirkətlərindən biri kimi o, neft quyularının qazılması, layların qiymətləndirilməsi, tamamlanması, hasilatı və laylar üzrə konsaltinq üzrə məhsul və xidmətlər təqdim edir. Şirkət Avstraliya, Sinqapur, Malayziya, Hindistan, Dubay, Səudiyyə Ərəbistanı, İtaliya, Almaniya, Norveç, Oklahoma, Luiziana və Missuri ştatlarında tədqiqat və istehsal müəssisələri ilə 120-dən çox ölkədə fəaliyyət göstərir.