Mayın 6-da ABŞ-ın Azərbaycandakı səfiri Mark Libbi xanımı Danusia ilə birlikdə Füzuli və Şuşa şəhərlərinə səfər edib.
Bu barədə ABŞ-ın Azərbaycandakı səfirliyinin Mətbuat xidməti məlumat yayıb.
“Bu gün səfir Libbi xanımı Danusia ilə birlikdə Füzuli və Şuşa şəhərlərinə səfər edib. Səfər zamanı səfir hökumət nümayəndələri ilə görüşməyi, xanımı ilə birlikdə Şuşa qalası, Xurşidbanu Natəvanın evi, Xan qızı bulağı, Vaqifin məqbərəsi ilə tanış olmağı, Cıdır düzünü gəzməyi və səfirliyin dəstəklədiyi ingilis dili proqramında iştirak edən yerli təhsil işçiləri ilə görüşməyi planlaşdırır”, məlumatda deyilir.
Məlumata görə, səfir Libbi Şuşada olarkən şəhərin inkişafı üçün görülən işlər və Şuşanın məcburi köçkün icmasının qayıdışı ilə bağlı ətraflı məlumat almaq üçün Şuşa rayonu üzrə xüsusi nümayəndə Aydın Kərimovla görüşüb.
"Onlar həmçinin, regionun yaşıl enerjisini və ABŞ-nin Azərbaycanın məcburi köçkün icmalarına və minalardan təmizləmə təşəbbüslərinə göstərdiyi dəstəyi müzakirə ediblər", məlumatda deyilir.
ABŞ-ın Azərbaycandakı səfiri Mark Libbi Şuşa şəhərinə səfəri zamanı Cıdır düzündə çıxış da edib. Səfir bildirib ki, Şuşada olmaqdan xoşbəxtdir.
“Biz iki aya yaxındır ki, bu səfərə hazırlaşırdıq və mən şadam ki, bu səfər nəhayət ki, baş tutdu. Mənim həyat yoldaşım Danusia və mən çox səmimi qarşılandıq və ev sahibləri mənə bu səfər proqramını təşkil etməkdə böyük dəstək göstərdi. Qonaqpərvərliyə görə təşəkkür edirəm. Bu səfər və şəhərin öz gözlərimlə gördüyüm inkişafı məndə çox böyük təəssürat yaratdı. Azərbaycanın bütün bölgələrinə səfərlərimi davam etdirməyi səbirsizliklə gözləyirəm. Bu gün Şuşadan başqa, hökumət nümayəndələri ilə də görüşmək, şəhəri görmək və səfirliyin həyata keçirdiyi ingilis dili proqramında iştirak etmiş yerli müəllimlərlə görüşmək üçün Füzuliyə də səfər edəcəyəm. Nə qədər ki, bizim Azərbaycanda işləmək istəyən tərəfdaşlarımız var, Birləşmiş Ştatlar bu ölkənin iqtisadi inkişafı və insanlarının rifahının dəstəklənməsi üçün çalışmağa davam edəcək”, səfir video çıxışında qeyd edib.
Qeyd edək ki, bu, ABŞ-ın Azərbaycandakı səfirinin Şuşaya ilk səfəridir.
Səfir Mark Libbi mayın 3-də jurnalistlərin Şuşaya səfər etməməsi barədə suala cavabında bildirib ki, burada siyasi səbəblər yoxdur.
"Hazır olanda gedəcəyəm, hələlik hazır deyiləm", səfir qeyd edib.
Xatırladaq ki, ABŞ-ın bundan öncəki səfiri Li Litsenberger Şuşaya səfər etməməsi səbəbindən tənqidlərə məruz qalmışdı.
Forum