Amerikanın Azərbaycanda demokratiya, insan hüquqları və söz azadlığı müzakirəsi

ABŞ dövlət katibinin demokratiya, insan hüquqları və əmək məsələləri üzrə müşaviri Tomas Melia Azərbaycanda iki günlük səfərdədir.

O aprelin 17-də prezident İlham Əliyev, xarici işlər naziri Elmar Məmmədyarov, Avropa İttifaqına üzv dövlətlərin Bakıda akkreditə olunmuş səfirliklərinin təmsilçiləri və Azərbaycanın siyasi partiya rəhbərləri ilə görüşüb.

Azərbaycan prezidentinin rəsmi saytının məlumatına görə, prezident Əliyevin Tomas Melia ilə görüşündə ABŞ Beynəlxalq İnkişaf Agentliyi Adminstratorunun Avropa və Avrasiya üzrə müşaviri Aleksander Peyci də iştirak edib.

Görüşlərdə regionda hadisələr, demokratiya, insan hüquqları və söz azadlığı məsələləri müzakirə olunub.

Melia ABŞ-ın yuxarıda qeyd edilmiş sahələrdə Azərbaycanla əməkdaşlıqda maraqlı olduğunu bildirib və bu sahədə qarşılıqlı fəaliyyətin davam etdirilməsinin əhəmiyyətini qeyd edib.

Həmçinin Tomas Meliaya Qarabağ nizamlanması üzrə danışıqlarda vəziyyət barədə məlumat verilib.

Nazir Məmmədyarov danışıqlar prosesində ATƏT-in Minsk qrupunun fəallığının artırılmasının vacibliyini qeyd edib

Tomas Melia müxalifət partiyalarının rəhbərləri ilə görüşündə isə AXCP sədri Əli Kərimli, Müsavat başqanı İsa Qəmbər, VİP sədri Əli Əliyev, “El” hərəkatının sədri Eldar Namazov və “REAL” hərəkatının təmsilçisi Erkin Qədirli iştirak edib.

Tərəflər Azərbaycandakı mövcud ictimai-siyasi vəziyyət və qarşıdan gələn prezident seçkisi ilə bağlı ətraflı müzakirə aparıb.

ABŞ rəsmisinin vətəndaş cəmiyyətinin təmsilçiləri ilə görüşü də gözlənilir.