Birləşmiş Ştatlar Azərbaycan hökumətini ölkədə insan hüquqları və media azadlığına hörmət etməyə çağırıb. ABŞ dövlət katibi Antoni Blinken keçən həftə verdiyi bəyanatda ABŞ-ın Azərbaycanda vətəndaş cəmiyyəti və mediaya qarşı təzyiqlərdən narahatlığını ifadə etmişdi. Beynəlxalq ictimaiyyət son bir il ərzində Azərbaycanda vətəndaş cəmiyyəti fəalları, jurnalistlər və siyasi opponentlərin həbsini narahatlıqla izlədiyini bildirir. Azərbaycan hökuməti dövlət katibi Blinkenin bəyanatını qərəzli adlandırıb. Rəsmi Bakı bir qayda olaraq ölkədə insanların siyasi baxışlarına görə təqib edilmədiyini bildirir. Müsavat Partiyasının Məclis sədri Arif Hacılı Amerikanın Səsinə müsahibədə Azərbaycanda insan hüquqlarının durumu, ABŞ-ın vətəndaş cəmiyyətinə təzyiqlərlə bağlı narahatlıqları və yeni Tramp administrasiyası dönəmində ABŞ-Azərbaycan münasibətlərindən gözləntilər haqda danışıb.