Noyabrın 15-də Rusiya Prezidenti Vladimir Putin ilə Azərbaycan Prezidenti İlham Əliyevin telefon danışığı olub.
Azərbaycan Prezidentinin Mətbuat Xidməti bildirir ki, telefon danışığı əsnasında dövlət başçıları iki ölkə arasında sənaye və nəqliyyat sahələrində qarşılıqlı faydalı layihələrin praktiki olaraq həyata keçirilməsi məsələlərini müzakirə ediblər.
“Tərəflər Azərbaycan-Rusiya strateji tərəfdaşlıq və müttəfiqlik əlaqələrinin hərtərəfli inkişafının davam etdirilməsinə dair qarşılıqlı maraqlarını bir daha ifadə ediblər. Müzakirə olunan məsələlərin icrası məqsədilə müxtəlif səviyyələrdə təmasların davam etdirilməsi razılaşdırılıb”, məlumatda qeyd edilir.
Rusiya Prezidentinin Mətbuat xidməti də eyni məzmunlu məlumat yayıb.
Rusiya Prezidenti Vladimir Putin bu ilin avqustunda Azərbaycana səfəri zamanı bildirib ki, Azərbaycan və Rusiya Xəzər dənizində qarşılıqlı fəaliyyəti davam etdirmək niyyətindədir.
Tərəflər ticarət-iqtisadi, sənaye və kənd təsərrüfatı əməkdaşlığının daha da gücləndirilməsinin, turizm və tranzit axınlarının, o cümlədən hava kommunikasiyalarının, habelə dəmir yolu və multimodal yükdaşımaların və Şimal-Cənub tranzit dəhlizinin infrastrukturun inkişafı hesabına genişləndirilməsinin vacibliyini vurğulayıb.
Vladimir Putin bildirib ki, Rusiya və Azərbaycan bir-biri üçün mühüm iqtisadi tərəfdaşlardır.
“Ticarət dövriyyəsi dörd milyard dollardan bir qədər çoxdur və o, bu ilin birinci yarısında 17 faiz artıb. Azərbaycan iqtisadiyyatına dörd milyard (dollardan) artıq birbaşa investisiya qoyulub. Və təbii ki, Azərbaycan bazarında fəaliyyət göstərən 1300-ə yaxın müəssisə (Rusiyanın iştirakı ilə) bizim vəziyyətimizin müsbət istiqamətdə inkişaf etdiyini və yaxşı inkişaf perspektivlərinin olduğunu deyir”, o qeyd edib.
Forum