Gürcüstanda ekstradisiya məqsədi ilə barəsində üç ay həbs qətimkan tədbiri seçilmiş jurnalist Əfqan Sadıqovun bu ölkənin Penitensiar Xidmətinin Tibb müəssisəsində ötən həftənin son günlərində vəziyyəti ağırlaşıb. O artıq 31 gündür aclıq edir.
Jurnalistin həyat yoldaşı Sevinc Sadıqova bu gün, oktyabrın 21-də Əfqan Sadıqovla telefonla danışığından sonra Amerikanın Səsinə bildirib ki, onun vəziyyəti çox ağırdır.
“Ötən həftənin 4-cü, 5-ci və 6-cı günü (17, 18, 19 oktyabr) təzyiqi 65/55 olub. Ağzından dayanmadan sarı maye gəlməyə başlayıb. O dedi ki, vəziyyəti o qədər ağır olub ki, hətta öləcəyini düşünüb. Həkimlər Əfqanın təzyiqini normallaşdırmaq üçün müdaxilə edib sistem köçürüblər. Əfqan hələ də aclıq aksiyasını davam etdirir”, o qeyd edib.
Onun sözlərinə görə, oktyabrın 21-də Penitensiar Xidmətinin Tibb müəssisəsində jurnalistin ailəsi ilə telefon danışığına belə güclə icazə veriblər.
“Əfqan bildirdi ki, bu gün onun telefon danışığına imkan vermirlərmiş. Yalnız təkrar iradlarından sonra telefon danışığına imkan veriblər. Dedi ki, qanunsuz olaraq telefon danışığına qadağa qoymaq istəyirlər”, o qeyd edib.
Sadıqovanın dediyinə görə, həyat yoldaşının sağlamlıq durumu o qədər ağır olub ki, ötən həftə hətta vəkili ilə görüşüb danışmaq iqtidarında olmayıb.
“Bu səbəbdən vəkil ilə görüş baş tutmayıb. Vəkil onun ağır durmunu görüb və Tibb müəssisəsini tərk edib. Vəkil çox həyacanlı idi, Mənə dedi ki, Əfqanın vəziyyəti çox ağırdır”, Sadıqova qeyd edib.
Gürcüstan həbsxanasında sentyabrın 21-dən aclıq edən jurnalist Əfqan Sadıqovun səhhəti kəskin pisləşdiyindən oktyabrın 14-də bu ölkənin Penitensiar Xidmətinin Tibb müəssisəsinə köçürülüb.
Bundan öncə, jurnalistin hüquqlarını müdafiə edən “Gürcüstanın Hüquqları” təşkilatı Əfqan Sadıqovun səhhətinin daha da pisləşməsinin qarşısını almaq üçün müvafiq tibb müəssisəsinə köçürülməsi üçün cəzaçəkmə müəssisəsinə müraciət edib.
Əfqan Sadıqov 2024-cü il sentyabrın 16-da Daxili İşlər Nazirliyinin Miqrasiya Departamentinin ona Gürcüstanda beynəlxalq mühafizə (sığınacaq) verilməsindən imtina etməsindən sonra sentyabrın 21-də aclıq aksiyasına başlayıb.
Oktyabrın 16-da Gürcüstan Sosial Ədalət Mərkəzinin hüquqşünası, vəkil Keti Çutlaşvili Gürcüstanda Əfqan Sadıqova bu ölkənin Miqrasiya Departamentinin beynəlxalq mühafizə (sığınacaq) verilməsindən imtina etməsindən məhkəməyə şikayət verib.
Azərbaycanlı jurnalist Əfqan Sadıqov 2023-cü il dekabrın 24-dən Gürcüstandadır və Gürcüstan Ədliyyə Nazirliyi tərəfindən verilmiş müvəqqəti yaşamaq icazəsinə malikdir.
İyulun 18-də Əfqan Sadıqov ailəsi ilə birlikdə Türkiyəyə getmək istəsə də, sərhədçilər ona icazə verməyiblər və bildiriblər ki, həyat yoldaşı və uşaqları sərhədi keçə bilər, lakin Əfqan Sadıqov yalnız Azərbaycana qayıda bilər. Gürcüstan tərəfində artıq Azərbaycanda ona qarşı cinayət işinin başlanması və axtarış elan edilməsi barədə məlumat olmasına baxmayaraq, səbəbi izah edilməyib.
Gürcüstan Prokurorluğunun məlumatına görə, Əfqan Sadıqova qarşı Azərbaycanda 2024-cü il mayın 9-da cinayət işi başlanıb. Mayın 13-də Azərbaycan tərəfi ekstradisiya tələbi ilə Gürcüstanın Baş Prokurorluğuna və Daxili İşlər Nazirliyinə müraciət edib.
Avqustun 2-də Əfqan Sadıqov “Gürcüstanın Hüquqları”nın vəkili ilə birlikdə Gürcüstanın ombudsmanı ilə görüşüb və onun Türkiyəyə buraxılmaması faktını müzakirə ediblər. Daxili İşlər Nazirliyi Əfqan Sadıqovun Gürcüstandan buraxılmamasının səbəbi ilə bağlı ombudsmanın ofisinə məlumat verməyib, habelə ona qarşı Azərbaycanda cinayət işinin başlanması və axtarış qərarı barədə məlumat verməyib.
Azərbaycanlı jurnalist avqustun 3-də Tbilisidə Mərkəzi Kriminal Polisinin nümayəndələri tərəfindən həbs edilib və o vaxtdan Qldanidəki 8 saylı cəzaçəkmə müəssisəsindədir. Onun həyat yoldaşı və azyaşlı uşaqları həbsin şahidi olublar. Əfqan Sadıqov axtarışda olduğunu və barəsində Azərbaycanda cinayət işi açıldığını yalnız həbs olunandan sonra bilib.
İstintaqın məlumatına görə, Əfqan Sadıqovun həbsi Azərbaycanın tələbi ilə həyata keçirilib. O, Azərbaycan Cinayət Məcəlləsinin 188.2.2 və 182.2.4-cü maddələrində nəzərdə tutulmuş cinayətdə - “hədə-qorxu ilə tələb etmə, tanımadığı şəxsin külli miqdarda əmlakını ələ keçirmə, təhqiredici məlumat yaymaqla hədələmə”də ittiham olunur.
Avqustun 4-də Tbilisi Şəhər Məhkəməsi azərbaycanlı jurnalist Əfqan Sadıqovun barəsində həbs qətimkan tədbiri olaraq 3 aylıq ekstradisiya həbsi qərarı verib.
Avqustun 8-də “Gürcüstanın Hüquqları” təşkilatının vəkilləri qərardan apellyasiya məhkəməsinə şikayət verərək, Əfqan Sadıqovun 3 aylıq ekstradisiya həbs cəzasının ləğv edilməsini, alternativ olaraq məhkəməyə girovdan istifadə olunmasını təklif edib. Eyni zamanda, Əfqan Sadıqov və vəkilləri Gürcüstan Daxili İşlər Nazirliyinin Miqrasiya Departamentinə Gürcüstandan beynəlxalq sığınacaq verilməsi xahişi ilə müraciət edib.
Avqustun 13-də Tbilisi Apellyasiya Məhkəməsinin İstintaq İşləri üzrə Kollegiyasının hakimi Giorgi Mirotadze “Gürcüstanın Hüquqları”nın apellyasiya şikayətini qəbuledilməz hesab edib və birinci instansiya məhkəməsinin qərarını dəyişməz saxlayıb.
Azel.TV saytının rəhbəri Əfqan Sadıqov bundan öncə 2020-ci ilin mayında hədə yolu ilə pul tələb etmək ittihamı ilə Azərbaycanda həbs edilib. 3 noyabr 2020-ci ildə məhkəmə onu yeddi il azadlıqdan məhrum edib. Apellyasiya Məhkəməsi cəza müddətini 6 ilədək, Ali Məhkəmə isə 4 ilədək azaldıb.
2 il 15 gün həbsdə saxlanıldıqdan sonra prezidentin əfv sərəncamı ilə azadlığa buraxılan Sadıqov həbsxanada 242 gün aclıq edib.
Yerli hüquq müdafiəçiləri onu siyasi məhbus kimi tanıyıb.
Forum