"Toplum" TV-nin hüquqi təsisçisi Ələsgər Məmmədli barəsində seçilmiş həbs qətimkan tədbirinin ev dustaqlığı ilə əvəzlənməsi ilə bağlı vəsatət təmin olunmayıb.
Bu barədə, mayın 24-də Bakının Xətai Rayon Məhkəməsi qərar qəbul edib.
Vəkil Aqil Layıc bildirib ki, Ələsgər Məmmədlinin səhhəti pisləşməkdə davam edir.
“O, xəstəxana şəraitində müayinə edilməli və müalicə almalıdır, bu da həbs şəraitində mümkün deyil. Təəssüf ki, Xətai Rayon Məhkəməsi vəsatətimizi təmin etmədi", o qeyd edib.
Vəkilin sözlərinə görə, Məmmədlinin qalxanabənzər vəzində olan şiş onda boğulmalar yaradır.
Müdafiə tərəfi məhkəmə qərarını antihumanist qərar kimi dəyərləndirib və qərardan apellyasiya şikayəti veriləcəyini bildirib.
Bundan başqa, Məmmədliyə səmərəli tibbi yardımın təmin edilməsi üçün Avropa İnsan Hüquqları Məhkəməsinə ərizə verilib.
Öz növbəsində, Penitensiar Xidmət rəsmi olaraq Ələsgər Məmmədlinin səhhəti ilə bağlı məlumatlara hələ münasibət bildirməyib. Penitensiar Xidmətin Müalicə Müəssisəsi isə məlumat almaq üçün nəzərdə tutulan telefonlarına cavab vermir.
Ələsgər Məmmədli martın 8-də saxlanılıb. Ona qarşı Cinayət Məcəlləsinin 206.3.2-cü maddəsilə (qabaqcadan əlbir olan bir qrup şəxs tərəfindən qaçaqmalçılıq) ittiham irəli sürülüb. Barəsində 4 aylıq həbs qətimkan tədbiri seçilib.
Bundan əvvəl, martın 6-da "Toplum TV" və Demokratik Təşəbbüslər İnstitutunun daha 7 əməkdaşı saxlanılıb. Onlardan 5-nin barəsində həbs qətimkan tədbiri seçilib, daha ikisi polis nəzarətinə verilib.
Forum