Ərdəbil valisinin açıqlamasına görə, vilayətdə 2 min yeni sinif otağına ehtiyac duyulur. Ərdəbil vilayətində məktəb çatışmazlığı son illərdə daha da ciddi hal alıb.
Ərdəbil valisi Hamid Amili Təhsil Şurasının iclasında bildirib ki, vilayətdə sinif otaqlarının çatışmazlığı problemini həll etmək üçün 6 min milyard tümənə ehtiyac var.
Ərdəbil valisinin sözlərinə görə, bəzi şəhərlərdə və bölgələrdə hər şagirdə düşən məktəb sahəsi 2 kvadratmetrdən azdır ki, bu da çox aşağı göstəricidir. Beləliklə, vilayətin məktəblərində şagird sıxlığı problemi mövcuddur.
İran İslam Respublikasının rəsmi İRİB (İran Radio Televiziya Qurumu) xəbər agentliyi təhsil üzrə vəzifəli şəxslərə istinadən bildirib ki, bu vilayətdə məktəb çatışmazlığı yaxın illərdə ciddi problemə çevriləcək, mövcud şərtlər növbəti illərdə də davam edərsə, məktəblər gələcək təhsil illərində yeni şagirdləri qeydiyyata almaqda ciddi problem yaşayacaq.
Ərdəbil vilayətində məktəb çatışmazlığı problemi yeni deyil və vilayət rəsmiləri bu məsələni illər əvvəl də qaldırmışdılar. 2015-ci ildə vilayətin təhsil rəhbəri Sabir Sepehri vilayətin böyük şəhərləri olan Xalxal, Meşginşəhr və Parsabadda məktəb çatışmazlığı probleminin olduğunu açıqlamışdı. Hazırda Aslanduzda daxil olmaqla vilayətin 5 şəhərində məktəblərdə şagird sıxlığı problemi var.
Ərdəbil valisi Həmid Amili ötən ilin dekabrında da Ərdəbildə təhsil infrastrukturunun kifayət qədər olmamasından danışıb və vilayətin bununla bağlı ciddi problemlərinin olduğunu açıqlamışdı. Lakin görünür ki, bu illər ərzində hökumət tərəfindən vilayətdə təhsil infrastrukturunun qurulması üçün lazımi kredit ayrılmayıb. Bu isə, vilayətdə təhsilin keyfiyyətinin aşağı düşməsinə səbəb olub və hətta universitetə qəbul reytinqinə mənfi təsir göstərib.
Ölkədə hər şagirdə düşən sinif sahəsi 6 kvadratmetr olduğu halda, Ərdəbil vilayətində bu rəqəm təxminən 4 kvadratmetrdir.
Forum