Bu gün, iyunun 28-də Qurban bayramı münasibəti ilə Azərbaycanın məscidlərində bayram namazı qılınıb.
Qafqaz Müsəlmanları İdarəsinin sədri Şeyxülisalm Allahşükür Paşazadənin bayram təbrikində deyilir ki, Qurban bayramının gecəsi və günü duaların qəbul olunduğu zamandır.
"Həmrəylik, yardımlaşma və mənəvi təmizlənmə rəmzi olan bu müqəddəs gündə Vətən uğrunda şəhid olan qəhrəman övladlarımızı rəhmət dualarıyla yad etmək, qazilərimizə, yaralılarımıza Allah-təaladan şəfaət və səadət diləmək bizim vəfa borcumuzdur" , o qeyd edib.
Prezident İlham Əliyev Qurban bayramı münasibətilə Azərbaycan xalqını və ölkədən kənarda yaşayan bütün soydaşları "İslam dünyasının birlik, bərabərlik və qardaşlıq rəmzi olan" müqəddəs Qurban bayramı münasibətilə təbrik edib.
ABŞ Dövlət Departamenti də Qurban bayramı münasibətilə tviter hesabında paylaşım edib.
"Mübarək və sevincli Qurban bayramı diləyi ilə. Qoy bu bayram və il boyu həyatınız sülh, xoşbəxtlik və cansağlığı ilə dolsun", Dövlət Departamentinin təbrikində deyilir.
ABŞ-ın Azərbaycandakı səfirliynin təbrikində isə deyilir: "Bu gün müsəlmanlar dünyanın hər bir yanında müqəddəs Qurban Bayramını qeyd edirlər. Biz həm ABŞ-da, həm də dünyada bu müqəddəs bayramı qeyd edən hər kəsi təbrik edirik! Qurban Bayramınız mübarək!"
Bu il 1440 azərbaycanlı zəvvar 8 təyyarə reysi ilə Həcc ziyarətinə gedib.
Qafqaz Müsəlmanları İdarəsi bu il Həcc ziyarətinə getmək istəyən vətəndaşlar üçün bir nəfərlik ziyarət paketinin qiymətini 5750 ABŞ dolları ( 9775,00 AZN ) müəyyən edib. Ötən il ziyarət qiyməti 9106 manat olub.
