Şahdəniz yatağından qaz ixracının dördüncü variantı meydana çıxıb

"Şahdəniz" yatağından "Mərhələ 2" layihəsi çərçivəsində qaz ixracının yeni - dördüncü variantı meydana çıxıb. Turan Agentliyinin xəbərinə görə, bu barədə Londonda BP-nin ofisində VR Group-un "Şahdəniz" üzrə vitse-prezidenti Al Kuk (Al Cook) azərbaycanlı jurnalistlərlə görüşündə bildirib.
Onun sözlərinə görə, Türkiyə ərazisindən Bolqarıstan, Rumıniya, Macarıstan və Xorvatiya istiqamətində kiçik güclü interkorrektor-boru kəmərləri tikmək təklif edilir. Onların vasitəsilə qaz ölkəyə daxil olub daxili şəbəkələrə bölünəcək, ölkələr arasında birləşdirici magistral boru kəmərləri olacaq.
Xatırladaq ki, oktyabrın 1-də "Şahdəniz" yatağından qaz nəql etmək istəyən boru kəməri layihələrinin iştirakçısı olan şirkətlərin təklif vermə müddəti bitir. Bu qaza Nabucco, ITGI və TAP da iddialıdır.