Yosemite səfəri sona yaxınlaşır. Vadidə olduğumuz axırıncı gün parkın ən məşhur iki şəlaləsi, Nevada və Vernal şəlalərinə doğru yola çıxmaq qərarına gəldik. Əvvəlcə Mist adlı çığırla başlayıb, sonradan John Muir adlanan ensiz, daş-kəsəkli və bəzən də buzlu cığırla təxminən 4 saata yaxın yol getdikdən sonra, nəhayət gəlib Vernal şəlaləsinin ən yuxarısına çatırıq. Buradan Mersed çayı boyunca vadiyə doğru açılan mənzərə insanı özünə valeh edir. Həmin an orada olub, o gözəlliyi gözlərinlə görüb, təbiətin ecazkarlığını bu qədər yaxından hiss edə bilmək insanı xoşbəxt edir. Bu hissləri yaşayarkən illər əvvəl Yosemite vadisinə ilk dəfə ayaq basdıqdan sonra bu təbiət möcüzəsinə aşiq olub, həyatlarını vadinin qorunmasına həsr edən insanları anlayır, haqq verir və minnətdar olursan.