İran universitetlərində təhsil müddətində 1 semestr Azərbaycan dili dərsləri tədris edilə bilər.
APA Agentliyinin məlumatına görə, bu barədə İran Ali Mədəniyyət Şurasının sədri Məhəmmədrza Moxber Dezfuli bildirib. Onun sözlərinə görə, İran universitetlərində 4 ay Azərbaycan dilinin tədris edilməsi mümkündür. Dərslərdə iştirak könüllü olacaq: “Tədris yalnız İran Ali Mədəniyyət Şurasının layihəsi çərçivəsində həyata keçirilə bilər. Dərslərə Fars dili və Ədəbiyyatı Mədəniyyət Mərkəzi də nəzarət etməlidir”.
Qeyd edək ki, İran Ali Mədəniyyət Şurası 2009-cu ildə universitetlərdə qeyri-fars dilinin tədrisi ilə bağlı layihə hazırlayıb. Azərbaycan, kürd, türkmən və bəluc dillərinin tədrisi üçün nəzərdə tutulan layihə hər seçkiqabağı gündəmə gətirilib müzakirə edilsə də, indiyədək həyata keçirilməyib.
