Siyasi məhbus Hamid Qaraoğlani, Urmiyə Mərkəzi Həbsxanasında keçirdiyi aclıq aksiyasına 17 fevralda son qoyub.
İnsan haqları üzrə fəaliyyət göstərən HRA xəbər agentliyi bu barədə məlumat yayıb.
O, məhkəmə tərəfindən şərti azadlığa buraxılma tələbinin rədd edilməsinə etiraz olaraq yanvar ayının ortalarından aclıq aksiyasına başlamışdı.
Aclıq aksiyası müddətində Qaraoğlaninin səhhəti ciddi şəkildə pisləşib. Qan şəkərinin düşməsi və fiziki zəiflik səbəbindən o, dəfələrlə həbsxananın klinikasına aparılıb. Buna baxmayaraq, həbsxana rəsmiləri onun tələblərinə etinasız yanaşıblar.
Aclıq aksiyası müddətində Qaraoğlaninin anası oğlunun həbsxana xaricində tibbi yardıma ehtiyacı olduğuna dair məhkəmə orqanlarına etdiyi müraciətləri nəticəsiz qalıb.
Qaraoğlani 2020-ci ilin iyun ayında İran Kəşfiyyat Nazirliyinin qüvvələri tərəfindən həbs edilib və Xalqın Mücahidləri Təşkilatına (MEK) üzv olmaqda ittiham olunub. Prokurorluq ona qarşı "müharibə" ittihamı irəli sürərək edam cəzası tələb etsə də, nəhayətdə məhkəmənin son qərarına görə, o 13 il həbs cəzasına məhkum edilib. Həbs müddətinin üçdə birini başa vurduqdan sonra şərti azadlığa buraxılma üçün müraciət edən Qaraoğlaninin tələbi rədd edilmişdi, bu da onun aclıq aksiyasına başlamasına səbəb olmuşdu.
Fevralın 9-da HRA agentliyi Qaraoğlaninin qan şəkərinin düşməsi səbəbindən həbsxananın klinikasına aparıldığını və həbsxana rəsmilərinin onun tələblərinə etinasız yanaşdığını bildirib.
Nəhayət, 17 fevralda Hamid Qaraoğlani aclıq aksiyasına son qoyub.
Forum