Yanvarın 29-da Azərbaycanda bələdiyyə seçkiləri keçiriləcək.
Mərkəzi Seçki Komissiyasının (MSK) məlumatına görə, seçki məntəqələri Bakı vaxtı ilə saat 8-də açılacaq və səsvermə saat 19-da başa çatacaq.
Mərkəzi Seçki Komissiyasının sədri Məzahir Pənahov bildirib ki, Azərbaycanda hazırda bələdiyyə seçkilərində səsvermə hüququ olan 5 milyon 961 min 987 seçici var.
Onun sözlərinə görə, yanvarın 29-da seçkilər 118 seçki dairəsinin 5846 seçki məntəqəsində baş tutacaq. 685 bələdiyyəyə 8071 bələdiyyə üzvü seçiləcək. Seçkidə 16 min 96 namizəd mübarizə aparacaq.
Pənahov bildirib ki, bələdiyyə seçkilərini 70 min 625 nəfər yerli müşahidəçi izləyəcək.
MSK sədri yanvarın 29-da səsvermə gecəsi ilkin nəticələrin açıqlanacağını deyib.
"Hətta gecədən keçmiş belə olsa, ilkin nəticə səsləndiriləcək", o qeyd edib.
Seçki Müşahidə Alyansının rəhbəri Məmməd Məmmədzadə Amerikanın Səsinə deyib ki, bələdiyyə seçkiləri ilə bağlı heç bir aktivlik müşahidə olunmayıb.
“Azərbaycanda 29 yanvar bələdiyyə seçkiləri öncəsi təşviqat dönəmində nə siyasi partiyalar, nə də müstəqil namizədlər arasında debatlar və ya diqqətçəkən kampaniyalar keçirilməyib”, o qeyd edib.
Azərbaycan Xalq Cəbhəsi Partiayasından başqa ölkənin bütün siyasi partiyaları bələdiyyə seçkilərində iştirak edir.
Oktyabrın 18-də Prezident İlham Əliyev Milli Məclisin qəbul etdiyi “Bələdiyyələrin əraziləri və torpaqları haqqında” Azərbaycan Respublikasının Qanununa Əlavə - “Azərbaycan Respublikasında bələdiyyələrin siyahısı”nda dəyişiklik edilməsi barədə Qanunu imzalayıb. Qanuna əsasən ölkədəki mövcud 1400 bələdiyyənin birləşdirilərək ümumi sayının 685-ə endirilməsi təsdiqlənib.
Azərbaycanda indiyə qədər 6 bələdiyyə seçkisi keçirilib. Seçkilər 1999, 2004, 2009, 2011, 2014 və 2019-cu illəri əhatə edir.
Forum