İnsan hüquqları müdafiəçisi Bəxtiyar Hacıyevin vəkili onun konfidensiallıq hüququnun pozulduğunu deyir.
Vəkil Aqil Layıc bildirib ki, dekabrın 23-də Ağır Cinayətlər Məhkəməsində fəal Bəxtiyar Hacıyev planlaşdırılan vəsatətlərlə bağlı sənədləri vəkilə vermək istəyib.
Lakin mühafizəçilər buna imkan verməyiblər. Onlar sənədləri fəalın əlindən alıblar.
“Bu, təqsirləndirilən şəxsin vəkillə ünsiyyətinin məxfiliyinin və müdafiə hüququnun birbaşa pozuntusudur”, Layıc bildirib.
Vəkilin sözlərinə görə, mühafizəçilər sənədləri nə ona, nə də Hacıyevə qaytarmayıb.
O həmçinin qeyd edib ki, mühafizəçilərin qanunsuz hərəkətləri ilə əlaqədar Penitensiar Xidmətin rəhbərliyinə müraciət edib.
Azərbaycan Ədliyyə Nazirliyi Penitensiar Xidmət bu məlumatla bağlı hələ şərh verməyib.
Amma bir müddət əvvəl Amerikanın Səsinin sorğusuna cavabda Penitensiar Xidmət bildirib ki, həbs edilmiş bütün şəxslərin hüquqları təmin edilir və qanuni mənafeləri qorunur.
Bəxtiyar Hacıyevin növbəti məhkəmə prosesi dekabrın 28-nə təyin olunub.
Bəxtiyar Hacıyev 2022-ci ilin dekabrında xuliqanlıq və məhkəməyə qarşı hörmətsizlik ittihamları ilə həbs olunub.
Ötən il iyunun 16-da hüquq müdafiəçisinə qarşı yeni ittihamlar irəli sürülüb. Bu ittihamlar əsasən maliyyə məsələlərilə - ayrılan qrantların təyinatı üzrə xərclənməməsilə bağlıdır. Ona həmçinin Cinayət Məcəlləsinin 192-ci (qanunsuz sahibkarlıq), 193-1-ci (cinayət yoluyla əldə edilmiş əmlakı leqallaşdırma), 206-cı (qaçaqmalçılıq), 320-ci (saxta sənədlərdən istifadə) maddələrilə ittiham verilib.
Həmin ilin noyabrda isə ona qarşı Cinayət Məcəlləsinin 213.1-ci (vergidən yayınma) maddəsilə daha bir ittiham irəli sürülüb.
Hacıyevin özü və həmkarları onun həbsini Azərbaycan Daxili İşlər Nazirliyinin rəhbər şəxslərini kəskin tənqid etdiyinə görə siyasi sifariş hesab edir.
Bəxtiyar Hacıyev yerli hüquq müdafiəçiləri tərəfindən siyasi məhbus kimi tanınıb.
Çoxsaylı beynəlxalq təşkilatlar, o cümlədən Avropa İttifaqı, Avropa Parlamenti, Amnesty İnternational, həmçinin ABŞ Dövlət Departamenti Bəxtiyar Hacıyevin azadlığa buraxılması ilə bağlı dəfələrlə bəyanatlarla çıxış edib.
Amerika Birləşmiş Ştatlarının Dövlət katibi Antoni Blinken dekabrın 11-də Azərbaycan hökumətini insan hüquqlarını müdafiə etdiklərinə görə haqsız yerə həbs edilənləri azad etməyə çağırıb.
“Birləşmiş Ştatlar Azərbaycan hökumətini insan haqları sahəsində fəaliyyətlərinə görə həbs edilən Rüfət Səfərov, Sevinc Vaqifqızı, Azər Qasımlı, Fərid Mehrəlizadə, Bəxtiyar Hacıyev, Qubad İbadoğlu, Meydan TV-nin bu yaxınlarda həbs olunan əməkdaşları və bir çox başqalarını dərhal azad etməyə çağırır,” Antoni Blinkenin bəyanatında deyilir.
Azərbaycan Xarici İşlər Nazirliyi bildirib ki, “ABŞ Dövlət katibi Antoni Blinkenin Azərbaycanda insan hüquqları və azadlıqlarının qorunması ilə bağlı mövcud vəziyyəti təhrif edən, Azərbaycanın məhkəmə-hüquq prosesinə müdaxilə məqsədli qərəzli bəyanatını pisləyir və rədd edir”.
Forum