İctimai fəal Nicat İbrahim barəsindəki cinayət işi üzrə ibtidai istintaq başa çatıb. Cinayət işi bu günlərdə baxılması üçün Bakı Ağır Cinayətlər Məhkəməsinə göndəriləcək.
Bu barədə vəkil Zibeydə Sadıqova Amerikanın Səsinə bildirib.
Onun sözlərinə görə, Nicat İbrahim ittihamları qəbul etmir və qurama hesab edir.
Nicat İbrahimin həyat yoldaşı Pərvin İbrahim Amerikanın Səsinə bildirib ki, istintaq hadisə yerindəki kamera görüntülərini götürməyib.
“Nicat dəfələrlə bildirib ki, ittihamlar quramadır, onu təsdiq edən hər hansı dəlil yoxdur. Hadisə baş verən yerdə çoxsaylı kameralar var və kamera görüntüləri ilə hadisənin necə baş verdiyini görmək olar. Buna baxmayaraq hadisə baş verən yanacaqdoldurma məntəqsinin kameralarındakı görüntülər iş materiallarına daxil edilməyib”, o Amerikanın Səsinə deyib.
Pərvin İbrahimin sözlərinə görə, Nicat İbrahim istintaqa etiraz olaraq bir neçə dəfə özünə xəsarət yeriməklə intihara cəhd edib.
“O üçüncü dəfə, bu günlərdə ayaqları və əlləri sulu halda özünü elektrik cərəyanına qoşub. Həyatını xilas edə biliblər. Amma, qollarında və sinəsində yanıq yerləri qalmaqdadır”, Pərvin İbrahim qeyd edib.
Pərvin İbrahim bildirib ki, həyat yoldaşı intihara cəhd etdikdən sonra onun boğazında qan laxtaları yığılır, qulaqlarında və sinə nahiyyəsində kəskin ağrılar var. Təzyiqi yüksəkdir.
Sentyabrın 6-da Nicat İbrahimi Bakı Beynəlxalq Hava Limanının sərhəd keçid məntəqəsindən buraxmayıblar. Ona bildiriblər ki, Daxili İşlər Nazirliyi ölkədən xaricə çıxışına qadağa qoyub. Onun həyat yoldaşı və iki uşağı sərhəd keçid məntəqəsini keçərək Kişinyova gedib.
Bundan sonra Nicat İbrahim Daxili İşlər Nazirliyinin 102 Zəng Mərkəzinə zəng edərək bildirib ki, məhkəmənin onun ölkədən çıxışına qoyulmuş qadağanın götürülməsi barədə qərarı var.
"Əgər onun ölkədən çıxışına qoyulmuş qadağa götürülməsə, Daxili İşlər Nazirliyinin binası qarşısında özünü yandıracaq. Bundan sonra o, sentyabrın 9-da yanacaqdoldurma məntəqəsində olanda bir nəfər onu vurub. Nicat yıxılıb. Dərhal polislər onun gözünü bağlayaraq saxlayıblar", vəkil Zibeydə Sadıqova bildirib.
Sentyabrın 9-da Nicat İbrahim Nəsimi Rayon Polis İdarəsində ittihamı qəbul etmədiyi üçün fiziki zorakılığa məruz qalıb.
"O, etiraz olaraq polis idarəsində stolun üzərində olan kağız kəsmək üçün istifadə edilən alətlə boğazını kəsməklə intihara cəhd edib. Halı pisləşdiyindən həkimə aparıblar. Boğazının kəsilmiş nahiyəsinə 17 tikiş qoyublar. Bundan sonra Bakı şəhər Nəsimi Rayon Məhkəməsi Nicat barədə həbs qətimkan tədbiri seçib və onu Kürdəxanı həbsxanasına (1 saylı Bakı İstintaq Təcridxanası-red) aparıblar", Pərvin İbrahim Amerikanın Səsinə deyib.
Pərvin İbrahimin sözlərinə görə, həyat yoldaşı təcridxanada da özünə qəsd etməklə intihara cəhd edib.
Penitensiar Xidmət Amerikanın Səsinin sorğusuna cavabda bildirib ki, Nicat İbrahimin tələbləri Penitensiar Xidmətə aid deyil.
"Onun özünə xəsarət yetirməsi məsələsinə gəlincə, bu barədə aidiyyatı üzrə məlumat göndərilib və araşdırılır", Penitensiar Xidmətin cavabında deyilir.
İctimai fəal barəsində əvvəlcə Cinayət Məcəlləsinin 126.1-ci (Qəsdən sağlamlığa ağır zərər vurma) maddəsi ilə cinayət işi başlanıb. Dekabrın 12-də ittiham ağırlaşdırılıb. Ona qarşı Cinayət Məcəlləsinin 126.2.4 (Qəsdən sağlamlığa ağır zərər vurma- ümumi təhlükəli üsulla, xuliqanlıq niyyətilə) və 221.3 (Xuliqanlıq-əməllərin silahdan və ya silah qismində istifadə olunan əşyalardan istifadə edilməklə törədilməsi zərər çəkmiş şəxsə zor tətbiq olunması ilə, yaxud özgənin əmlakının məhv edilməsi və ya zədələnməsi ilə müşayiət olunduqda) maddələri ilə yeni itthamlar verilib.
Yeni ittihamlar sübut olunarsa onu 6 ildən 11 ilədək həbs gözləyir.
Bundan öncə, Nicat İbrahim 2021-ci il martın 5-də Bakının Nəsimi rayon Məhkəməsinin hökmü ilə 1 il 3 ay azadlıqdan məhrum edilib.
O, Cinayət Məcəlləsinin 139-1.1-ci maddəsi ilə - koronavirus olduğu halda, küçəyə çıxıb başqalarının həyatına təhlükə yaratmaqda təqsirli bilinib.
Nicat İbrahim 2020-ci il iyulun 20-də Prezident Administrasiyasının qarşısında etiraz aksiyası keçirməyə gedərkən saxlanılıb.
Məhkəmədə son sözündə İbrahim günahsız olduğunu, heç vaxt koronavirusa yoluxmadığını, etiraz aksiyası keçirmək istədiyinə görə cəzalandırıldığını deyib.
Nicat İbrahim ictimai fəaldır. O, sosial şəbəkələrdə çoxsaylı tənqidi statusları ilə hökuməti tənqid edib.
İbrahim bir neçə il əvvəl ağzını tikib aclıq etməklə polislərə qarşı etiraz aksiyası da keçirib.
Azərbaycanda son illərdə bir neçə fəal kiməsə bıçaqla xəsarət yetirməkdə ittiham edilərək həbs olunsa da, onlar bu ittihamı qəbul etmirlər. Fəallar məhkəmədə bildiriblər ki, həmin şəxslər əvvəldən öyrədilmiş ssenari üzrə özlərinə xəsarət yetirərək, bıçaqlanmaları görüntüsünü yaradıblar.
Bu cür ittihamla həbsdə olunanlar arasında Azərbaycan Xalq Cəbhəsi Partiyasının fəalları Aqil Hümbətov, Zamin Salayev, Almaniyada Azərbaycan hökuməti əleyhinə etiraz aksiyalarında iştirak etmiş və Almaniyadan readmissiya olunandan sonra həbs olunmuş Samir Aşurov, İşçi Masası Həmkarlar İttifaqları Konfederasiyasının İdarə Heyətinin sədri Afiəddin Məmmədov, hökumətin siyasətini tənqidləri ilə tanınan keçmiş diplomat Emin İbrahimov da var. Dekabrın 3-də isə hüquq müdafiəçisi Rüfət Səfərov buna oxşar hadisə ilə həbs edilib.
Forum