"Rabitə və Telekommunikasiya İşçiləri Kapital Şirkəti"nin işçiləri, tələblərinin yerinə yetirilməməsi səbəbindən sentyabrın 14-də yenidən piket keçiriblər.
Bu barədə İLNA (Iranian Labour News Agency) xəbər agentliyi məlumat yayıb.
Telekommunikasiya işçiləri bundan əvvəl iyul ayında Təbrizdəki Telekommunikasiya İdarəsinin qarşısında bir neçə gün etiraz aksiyası keçirmişdilər.
İşçilərin sözlərinə görə, həmin etirazlar zamanı rabitə şirkətinin nümayəndəsi onlara müəyyən vədlər versə də, vəd edilənlər bir müddət sonra həyata keçirilməyib. İşçilər bildirirlər ki, verilən vədlər qeyri-ciddi və əsassız olub, bu isə işçilərin haqlı narazılığına səbəb olub.
İşçilər bu dəfəki piketdə də tələblərinə əhəmiyyət verilməməsinə etiraz edərək, istəkləri yerinə yetirilməyənə qədər aksiyaları davam etdirəcəklərini bəyan ediblər.
Onların əsas tələbləri əmək haqqı borclarının ödənilməsi, müqavilə şərtlərinə riayət edilməsi, sığorta haqları və digər sosial təminatların təmin olunmasıdır.
Bu etirazlar təkcə telekommunikasiya işçilərinin deyil, İranın ümumi iqtisadi və sosial vəziyyətindəki gərginliklərin əksidir. Ölkə son illərdə ciddi iqtisadi çətinliklər, yüksək inflyasiya və işsizliklə üzləşir ki, bu da müxtəlif sahələrdə çalışan işçilərin əmək haqlarının gecikməsi, sosial təminatların zəifləməsi və iş şəraitinin pisləşməsinə səbəb olub.
Forum