"Azərbaycanın ötən ildən indiyə kimi Bolqarıstanı 555 milyon kubmetr təbii qazla təchiz edib. Bu ilin iyul ayından Bolqarıstana gündəlik qaz nəqli 2,6 milyon kubmetrə yüksəldilib və ilin sonuna qaz ixracı, təxminən, 600 milyon kubmetr proqnozlaşdırılır".
Bu barədə energetika naziri Pərviz Şahbazov Azərbaycanda səfərdə olan Bolqarıstanın iqtisadiyyat və sənaye naziri Nikola Stoyanov ilə görüşdə bildirib.
Energetika Nazirliynin mətbuat xidmətinin məlumatına görə, görüşdə Yunanıstan-Bolqarıstan İnterkonnektorunun (IGB) kommersiya fəaliyyətinə başlamasının oktyabra planlaşdırıldığı qeyd edilib və kəmərin Bolqarıstan, ümumilikdə isə Cənub-Şərqi Avropanın enerji təchizatına töhfə verəcəyi vurğulanıb.
Söhbət zamanı Cənub Qaz Dəhlizi layihəsinin genişləndirilməsi çərçivəsində Bolqarıstana əlavə qaz həcmlərinin tədarükü perspektivləri də nəzərdən keçirilib.
Bolqarıstanın iqtisadiyyat və sənaye naziri Nikola Stoyanov isə ölkəsinin TAP-ın genişləndirilməsi mərhələsində əməkdaşlığa marağını ifadə edib.
Görüşdə, həmçinin Azərbaycanın Xəzər dənizinin külək enerjisi potensialından elektrik enerjisi, hidrogenin istehsalı və ixracı ilə bağlı planları və "yaşıl enerji"nin Avropaya ixrac perspektivləri üzrə əməkdaşlıq imkanları ətrafında fikir mübadiləsi aparılıb.
Bu il iyulun 8-də Yunanıstan-Bolqarıstan İnterkonnektoru (Interconnector Greece – Bulgaria, IGB) Azərbaycandan Bolqarıstana təbii qaz nəql edəcək Trans-Adriatik Qaz Boru Kəmərinə (TAP) qoşulub.
ICB (Gas Interconnector Greece-Bulgaria, Yunanıstan-Bolqarısan Qaz İnterkonnektoru) müstəqil ötürmə operatoru bildirir ki, birləşmə Komotinidəki qazölçmə stansiyasının mövcud TAP infrastrukturuna iki qızıl qaynaqla birləşdirilməsi ilə tamamlanıb.
"IGB işə salındıqdan sonra bu qoşulma əvvəlcə Bolqarıstanı ildə 1 milyard kubmetr qazla təmin edəcək, sonrakı mərhələdə isə bu həcm 3 milyard kubmetrə qədər artacaq ki, bu da interkonnektorun hazırkı gücünə uyğundur" , operator vurğulayıb.
İnterkonnektorun kommersiya fəaliyyətinə başlaması ilə Bolqarıstana təkcə Azərbaycan qazını almağa deyil, həm də onu Yunanıstanın LNG terminallarından nəql etməyə imkan verəcək, bu isə Rusiyanın ölkənin qaz bazarındakı monopoliyasını aradan qaldıracaq.
"IGB layihəsi Bolqarıstan və Cənub-Şərqi Avropa regionu üçün tədarük təhlükəsizliyinin artırılması və təbii qaz mənbələrinin şaxələndirilməsinin təmin edilməsində mühüm əhəmiyyət kəsb edir. Regional səviyyədə IGB Bolqarıstan bələdiyyələri və hələ qoşulma imkanı olmayan regionlar üçün qaz ötürücü şəbəkəyə çıxışı təmin edəcək. Yunanıstan ilə interkonnektor təbii qazın Avropaya ötürülməsi üçün tamamilə yeni marşrutdur, Bolqarıstan və regiona yeni mənbələrdən təchizat əldə etmək imkanı verəcək. Layihə ölkəmizi Cənub Qaz Dəhlizi ilə birləşdirəcək və TAP, TANAP, EastMed və Aleksandrupolisdəki LNG terminalı kimi böyük enerji layihələri ilə əla sinerjiyə malikdir" - deyə, ICGB-nin Bolqarıstan tərəfdən icraçı direktoru Teodora Georgieva bildirib.
Neft Araşdırmaları Mərkəzinin rəhbəri İlham Şaban bildirib ki, Bolqarıstan Azərbaycandan ötən illə müqayisədə qaz idxalını 3 dəfəyədək artırmaq imkanı əldə edəcək.
"Bu, Bolqarıstanın Rusiyadan qaz asılılığını ilkin olaraq 35 faizədək azaldacaq. Rəsmi Sofiya Azərbaycandan əlavə qaz həcmləri almaq üçün artıq Azərbaycan Dövlöt Neft Şirkıtinə (SOCAR) müraciət edib" , ekspert qeyd edib.
Eyni zamanda layihənin ikinci mərhələsi təklif edilib ki, bu da kəmərin ötürücülüyünü ildə 5 milyard kubmetrə çatdıracaq.
IGB Xəzər dənizinin Azərbaycan sektorundakı "Şahdəniz" qaz kondensat yatağının II mərhələdə istismarı çərçivəsində hasil edilən təbii qazın Bolqarıstana nəqlini nəzərdə tutur. Ümumi uzunluğu 182 kilometr olan boru kəmərinin 150 kilometri Bolqarıstan ərazisindən keçir. Kəmərin illik ötürücülük gücü 3-5 milyard kubmetr həcmindədir.
Cənub Qaz Dəhlizinin inkişafı çərçivəsində İGB vasitəsilə Cənub-Şərqi və Mərkəzi Avropa ölkələri Xəzər regionundan alternativ tədarüklərə və mayeləşdirilmiş təbii qaz idxal etmək imkanına malik olacaq.
TAP-ın ümumi uzunluğu 878 km-dir. Bunun da 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizindən, 8 km-i isə İtaliyanın cənubundan keçir. Qaz kəmərinin ötürmə qabiliyyətinin ildə 20 milyard kubmetrə qədər çatdırılması planlaşdırılır.
