Təhlilçilər Azərbaycan və İran arasında Azərbaycan ərazisi ilə Naxçıvanı birləşdirəcək nəqliyyat və kommunikasiya dəhlizinin açılması ilə bağlı imzalanmış anlaşma memorandumunun təkcə iki ölkə arasında deyil, bütünlüklə region, eləcə də Şərq-Qərb, Avropa və Asiya arasında kommunikasiyaların qurulmasında və inkişafında mühüm rol oynayacağını gözlədiklərini bildirir. Siyasi təhlilçi Fuad Şahbazov Amerikanın Səsinə müsahibədə Azərbaycan və İran arasında anlaşma memorandumunun regionda ticarət və iqtisadi əlaqələrin gücləndirilməsində rolu, Ukraynada hazırda müharibə fonunda Moskvanın mümkün reaksiyası və İranla nüvə sazişinin canlandırılması səylərinin davam etdiyi bir vaxt Qərbin Bakı və Tehran arasında dialoqun yenilənməsi cəhdlərinə mümkün münasibətini şərh edib.