6-10 oktyabr tarixləri çərçivəsində Bakı Ekspo Mərkəzində VII Bakı Beynəlxalq Kitab Sərgi-Yarmarkası "Baku International Book Fair 2021" keçirilir. Sərgi Azərbaycanın şair və mütəfəkkiri Nizami Gəncəvinin 880 illik yubileyinə həsr olunub. Sərgidə nəşriyyatlar, mətbəələr, kitab mağazaları və mədəniyyət mərkəzləri təqdim olunur. Həmçinin, sərgidə ayrı-ayrı ölkələrdən 200-ə yaxın şirkət iştirak edir. Sərgi cəmiyyətdə mütaliənin təbliğini, kitab işi sahəsində istedadlı şəxslərin geniş kütlələrə tanıdılmasını və xüsusilə COVID-19 pandemiyası səbəbindən müəyyən çətinliklərlə üzləşən yaradıcı sənayelərin dəstəklənməsini hədəfləyir. Sərginin keçiriləcəyi 5 gün ərzində iştirakçılar və ziyarətçilər burada yazarlarla görüşlər, kitab təqdimatları, işgüzar toplantılar və Nizami Gəncəvinin həyat və yaradıcılığına dair müxtəlif tədbirlərlə tanış ola bilərlər.