Aprelin 20-dəBakı Ağır Cinayətlər Məhkəməsində hakim Səbuhi Hüseynovun sədrliyi ilə İŞİD terror qruplaşmasına maliyyə dəstəyi göstərməkdə ittiham olunan Samir Qurbanov və digər 10 nəfərin məhkəmə prosesi davam edib. Məhkəmə prosesi yekunlaşdıqdan sonra təqsirləndirilən şəxslərin ailə üzvləri Bakı ağır cinayətlər məhkəməsinin qarşısında etiraz aksiyası keçirib. İttiham olunan şəxslərin ailə üzvləri deyir ki, onlar artıq 50gündür aclıq edir və səhhətlərində ciddi problemlər yaranıb. Təqsirlənirilən şəxslər ittihamları qəbul etmir, bəraət tələb edirlər. Suriyada qanusuz silahlı birləşmələrdə döyüşməkdə, terrorçuluqda ittiham edilən Ələddin İbişov, Şəhriyar Cabbarov, Əflatun Bayramov, Elgün İsmayılov, Tehran Qasımov, Orxan Qurbanov, Amin Həsənov, Cavid Əmənov, Yusif İmanov, Samir Qurbanov və Babək Məmmədli bir neçə il qabaq həbs edilib. Onlar Cinayət Məcəlləsinin 167-2.2.1-ci (Qanunsuz olaraq dini təyinatlı ədəbiyyatı, audio və video materialları, mal və məmulatları və dini məzmunlu başqa məlumat materiallarını istehsal etmə, idxal etmə, satma və ya yayma; qabaqcadan əlbir olan bir qrup şəxs və ya mütəşəkkil dəstə tərəfindən törədildikdə), 167-2.2.2-ci (təkrar törədildikdə), 167-3.1-ci (Dini ekstremist materialları, yəni dini ekstremist fəaliyyəti həyata keçirməyə çağıran və ya belə fəaliyyəti əsaslandıran, yaxud belə fəaliyyətin zəruriliyinə bəraət qazandıran materialları hazırlama, saxlama və ya yayma), 214 (Terrorçuluq) və 218-ci (Cinayətkar birlik (təşkilat) yaratma) maddələri ilə təqsirləndirilirlər. 2020-ci ilin fevralında məhkəmə prosesi başlayıb. Məhkəmə iclasları bir müddət koronavirus pandemiyası səbəbindən təxirə salınıb. Bu il fevralın 23-də təqsirləndirilən şəxslər məhkəmə iclası zamanı özlərinə kəsici alətlə xəsarətlər yetirib.