Ukrayna ordusunun çərşənbə axşamı bildirdiyinə görə, Hava Hücumundan Müdafiə Qüvvələri keçən gecə ərzində Rusiyanın 18 pilotsuz uçuş aparatını məhv edib. Ukrayna Hərbi Dəniz Qüvvələrinə məxsus pilotsuz təyyarələr isə Krım yarımadası yaxınlığında Rusiyanın hərbi patrul gəmisini vurub.
Ukrayna hərbi kəşfiyyatı Ukraynaya məxsus pilotsuz təyyarələrin Kerç boğazı yaxınlığında vurduğu gəminin "Sergey Kotov" olduğunu müəyyən edib və gəminin "arxa, sağ və liman tərəflərini zədələndiyini" bildirib.
Bu hücum Ukraynanın Rusiyanın Qara dəniz donanmasını hədəf aldığı sonuncu hücumdur.
Ukrayna Hərbi Hava Qüvvələrinin bildirdiyinə görə, Rusiya keçən gecə ərzində ümumilikdə 22 pilotsuz uçuş aparatı buraxıb ki, onlardan 18-nin qarşısı Odesa üzərində alınıb.
Odesa vilayətinin qubernatoru Oleh Kiper xəsarət alanların olmadığını bildirib.
Kiper Telegram kanalında Rusiyanın hücumları nəticəsində istirahət obyekti və ev də olmaqla, bir neçə binanın zədələndiyini yazıb.
Ukrayna prezidenti Volodimir Zelenski bazar ertəsi gecə çıxışında Ukrayna rəsmilərinin Rusiyanın "növbəti planının" nədən ibarət olduğunu bildiyini və Ukraynanın "qarşılıqlı hərəkət edəcəyini" deyib.
Bunu o, yüksək səviyyəli hərbi və kəşfiyyat rəsmiləri ilə bir sıra görüşlər keçirdikdən sonra bəyan edib.
Bazar ertəsi Ukraynanın müdafiə naziri Rustam Umerov ABŞ-ın müdafiə naziri Lloyd Austinlə telefon danışığı zamanı yerlərdəki vəziyyəti müzakirə edib.
Pentaqon bəyanatında deyilib ki, Austin ABŞ və digər müttəfiqlərin Ukrayna ordusuna davamlı dəstəyini bir daha təkrarlayıb.
Austin və Umerov həmçinin ABŞ Konqresinin Ukraynaya yeni təhlükəsizlik yardımını təsdiqləməsinə "təcili ehtiyac" olduğu ilə bağlı eyni fikirdə olduqlarını bildiriblər.