Qeyri-fars uşaqlar ‘farsca yetərlilik testi’-ndən keçəcəklər

İranın təhsil nazirliyi “farsca yetərlilik testi”-nin məktəbəqədər uşaqlar üçün keçirilən müntəzəm sağlamlıq testlərinə əlavə olunacağını bildirib.

İSNA xəbər agentliyinin bildirdiyinə görə, bu plan İranın dini lideri Seyyid Əli Xameneyinin fars dilini öyrənməyin önəminə dair açıqlamalarından sonra təhsil nazirliyinin gündəminə gəlib.

İbtidai təhsil üzrə təlim və tərbiyə nazirinin müavini Rizvan Həkimzadə bu haqda deyib, “sağlımlıq testlərini uşaqların məktəbə daxil olmasından iki il əvvəl həyata keçirəcəyimizi ümid eidirik. Əlbəttə hazırda 5 yaşlı və məhdud şəkildə 4 yaşlı uşaqlar da bu testlərdən keçə bilirlər.”

SEE ALSO: İranda qeyri-farslar üçün 4 yaşından icbari fars dili tədrisi başlayacaq

Həkimzadə ‘farsca yetərlilik testinin’ həm öyrənmə problemli yaşayan uşaqlar üçün, həm də iki dilli (qeyri-fars) bölgələrin uşaqları üçün yararlı olacağını ifadə edib.

İranın dini lideri Seyyid Əli Xameneyi bu yaxınlarda dövlət qurumlarından fars dilinə daha artıq diqqət yetirilməsini tələb edib.

İranın dini lideri Seyyid Əli Xameneyi keçən günlərdə “fars dilinin aşınmaya məruz qalması” ilə bağlı “qayğılı” olduğunu dilə gətirmişdi.

İSNA-nın yazdığına görə, təhsil nazirliyinin hazırkı planı “müəzzəm öndərin fars dili ilə bağlı buyuruqlarına” uyğun olaraq təklif olunub.

Təhsil nazirliyinin açıqlamalarına təpki göstərən türk dil hüquqları müdafiəçiləri “bu planın ailələri kiçik yaşlardan uşaqlarla farsca danışmağa məcbur etmək” məqsədilə hazırlandığını önə çəkirlər.