ABŞ prezidenti Donald Tramp Birləşmiş Ştatların İraqda yerləşdirilmiş hərbi qüvvələrini ziyarət etmək üçün İraqa gözlənilmədən səfər edib.
ABŞ prezidentinin təyyarəsi Bağdad yaxınlığındakı Əl-Əsəd hərbi bazasında enib.
“Prezident Tramp və birinci xanım hərbi qüvvələrimiz və yüksək rütbəli rəhbərliyə göstərdikləri xidmətə, nailiyyətlərinə və verdiyi qurbanlara görə təşəkkür etmək və Milad bayramı münasibətilə ən xoş arzularını çatdırmaq üçün Milad gecəsi İraqa səfər ediblər” – deyə, Ağ Evin mətbuat katibi Sara Sanders Twitter sosial şəbəkəsində yazdığı mesajında bildirib.
President Trump and the First Lady traveled to Iraq late on Christmas night to visit with our troops and Senior Military leadership to thank them for their service, their success, and their sacrifice and to wish them a Merry Christmas. pic.twitter.com/s2hntnRwpw
— Sarah Sanders (@PressSec) December 26, 2018
Bu, prezident Trampın münaqişə zonasına etdiyi ilk səfərdir. ABŞ prezidentinin İraqa gözlənilmədən səfəri onun Birləşmiş Ştatların hərbi qüvvələrinin Suriyadan çıxarılacağını elan etməsindən bir neçə gün sonraya təsadüf edir.
Tramp hakimiyyətə gəldiyi vaxtdan ABŞ-ın münaqişə zonalarında yerləşdirilmiş hərbi qüvvələrini ziyarət etmədiyinə görə dəfələrlə tənqidlərə məruz qalmışdı.
Hazırda İraqda hərbi əməliyyatlar aparılmasa da, ABŞ hərbçiləri İslam Dövləti qrupuna qarşı mübarizə aparan İraq hərbi qüvvələrinə təlim verir.