The Economist jurnalı Ermənistanı “İlin ölkəsi” adlandırıb. Məcmuə bildirir ki, bu ölkə küçə etirazlarının hökuməti dinc yolla dəyişməsindən sonra “demokratiya və yenilənmə şansı” əldə edib.
Londonda çıxan jurnal dekabrın 18-də yazıb ki, keçmiş antikorrupsiya jurnalisti və müxalifətçi millət vəkili Nikol Paşinyan “korrupsiya və səriştəsizliyə qarşı etirazların dalğası ilə legitim və qaydalı şəkildə hakimiyyətə gəlib”.
Paşinyanın may ayından başlatdığı etiraz aksiyaları uzun müddətdə prezidentlik etmiş Serj Sarkisyanın istefası ilə nəticələnib.
Paşinyanın “Mənim addımım” alyansı dekabrın 9-da keçirilmiş parlament seçkisində səslərin 70 faizinə sahiblənərək qalib gəlib.
The Economist yazır: “Putinsayağı hakim devrilib və heç kəs öldürülməyib. Rusiyaya müdaxilə bəhanəsi verilməyib. Təlatümlü regionda yerləşən, qədim və çox vaxt da düzgün idarə olunmayan ölkə indi demokratiya və yenilənmə imkanı qazanıb”.
Lakin həftəlik jurnal yazır ki, Ermənistanın Azərbaycanla separatçı Dağlıq Qarabağ regionuna görə xatalı münaqişəsi “hələ də həllini tapmayıb və yenidən alovlana bilər”.
The Economist jurnalı 2013-cü ildən başlayaraq “İlin ölkəsini” müəyyən edir.
Bu titul “son 12 ayda ən böyük yaxşılaşma nümayış etdirmiş” ölkələrə verilir.