“Milli Şura hökumətin antixalq qərarını qətiyyətlə pisləyir və onun milyonlarla insanın həyatında özünü göstərəcək ağır nəticələrini aradan qaldırmaq üçün təcili, müvafiq tədbirlər görülməsini tələb edir”. Bu barədə Milli Şuranın hökumətin benzinin qiymətini artırması ilə bağlı qərarına etiraz bəyanatında deyilir.
Milli Şura xalqa çağırış edir ki, özünə qarşı hökumətin belə saymazyana davranışına laqeyd qalmasın, kütləvi, lakin dinc və ardıcıl mübarizə ilə taleyinə sahib çıxmaq barədə düşünsün.
“İstənilən hökumət xalqın qətiyyətli tələbləri qarşısında geri çəkilməyə məcburdur”, sənəddə deyilir.
İyulun 14-də Azərbaycan Tarif Şurasının qərarı ilə Aİ 92 markalı benzinin 1 litrinin qiyməti 70 qəpikdən 90 qəpiyə qaldırılıb.
Bəyanatda deyilir ki, İlham Əliyev və komandasının yarıtmaz fəaliyyəti, korrupsiyanı dövlət siyasətinə çevirməsi milyonlarla azərbaycanlının həyat səviyyəsini daha da ağırlaşdırmaqla nəticələnir.
“Sadəcə İlham Əliyev hökuməti dünya bazarında neftin nisbətən ucuzlaşması ilə ölkə iqtisadiyyatında yaranan çöküşün əvəzini xalqın cibindən çıxarmaq istəyir. Düzgün iqtisadi siyasət qura bilməyən, ölkəni neftdən asılı vəziyyətə salan, korrupsiya və monopoliya ilə bütün mümkün iqtisadi təşəbbüsləri boğan İlham Əliyev hökuməti uzun illər ərzində neftdən gələn gəlirləri də israfçılıqla dağıdaraq, hazırkı acınacaqlı vəziyyətə səbəb olub”.
Milli Şura hesab edir ki, ölkənin gəlirləri lüzumsuz əyləncələrə, idman yarışlarına sərf olunur.
“Dövlət neft şirkəti – SOCAR pis idarəçilikdən əziyyət çəkir. Şirkətdəki nəhəng korrupsiya əməliyyatları milyardlarla neft pullarını yoxa çıxarıb. Şirkətin gəlirləri düzgün idarə edilmədiyi və qorunmadığı üçün SOCAR-ın özü hazırda müflis həddinə çatıb”.
Milli Şura hesab edir ki, benzinin qiymətinin artırılması ölkədə növbəti total bahalaşmaya səbəb olacaq.
“Bu qiymət artımının ardınca bütün yerli istehsal mallarının, nəqliyyat xərclərinin bahalaşması qaçılmazdır. Artıq yeni bahalaşma dalğası özünü bəzi xidmətlərin və məhsulların, o cümlədən ət və dərmanların qiymətində göstərir”, sənəddə qeyd edilir.
Öz növbəsində, Azərbaycan hökuməti benzinin qiymətinin artırılmasının digər mal və xidmətlərin qiymətlərinin bahalaşmasına səbəb olmadığını bildirir.