Avropa İnsan Hüquqları Məhkəməsi Azərbaycana qarşı on iş üzrə kommunikasiyaya başlayıb.
Bu şikayətlərin dördünü vəkil Cavad Cavadov müdafiə edir.
Vəkil bildirib ki, şikayətlərin ikisi Nardaran işi ilə bağlı tutulan Zülfüqar Mikayılov və Elman Ağayevlə bağlıdır.
Belə ki, Bakı Ağır Cinayətlər Məhkəməsi hakim Zeynal Ağayevin sədrliyi ilə 2017-ci ilin sentyabrında Zülfüqar Mikayılovu 17 il, Elman Ağayevi 13 il azadlıqdan məhrum edib.
Digər şikayət Vüqar Əliyevin işi ilə bağlıdır. O, 2015-ci ilin martında Cinayət Məcəlləsinin 228.1. maddəsi (Qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmək) ilə ittiham edilib. Əliyev Qarabağ Azadlıq Təşkilatının fəalı olub.
Digər bir iş Kəlbəcər rayon təhsil şöbəsinin keçmiş müdiri Məhəmməd Bağırovla bağlıdır. O, 2014-cü ildə Cinayət Məcəlləsinin 308.2-ci (vəzifə səlahiyyətlərindən sui-istifadə) maddəsi ilə cinayət məsuliyyətinə cəlb olunub. Gəncə Ağır Cinayətlər Məhkəməsinin hökmü ilə 10 ila azadlıqdan məhrum edilib. Apellyasiya instansiyası həbsi 9 ilə endirib.
“Məhəmməd Bağırovla bağlı Avropa Məhkəməsinə şikayət göndərməyimin səbəbi ondan ibarət olub ki, onu altı ay başqa yerə getməmək haqqında iltizamda saxlayıblar, sonra iltizamın şərtlərini pozmadığı halda təqdimat verib məhkəmədə həbs ediblər”, Cavadov qeyd edib.
Beşinci iş “Meydan TV”nin direktoru Emin Millinin qaynı Nazim Ağabəyovin şikayəti ilə bağlıdır. Ağabəyov 2015-ci ilin iyulunda həbs edilib. 2016-cı il aprelin 22-də iki il sınaq müddəti olmaqla 3 il azadlıqdan şərti məhrum edilib və məhkəmə zalından azadlığa buraxılıb. O, Cinayət Məcəlləsinin 234.1 maddəsi (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) ilə ittiham olunub.
Bundan başqa, AİHM 2011-ci ildə həbs edildikdən sonra bir müddət havalandırılmayan, iki nəfər üçün nəzərdə tutulmuş kamerada 7 digər məhbusla birlikdə saxlanılan hüquq müdafiəçisi Vidadi İsgəndərlinin şikayəti üzrə kommunikasiyaya başlayıb.
İsgəndərli 2011-ci ilin aprelində güc tətbiq etməklə seçki hüquqlarının həyata keçirilməsinə mane olmaq və seçki komissiyalarının işinə güc tətbiqi ilə müdaxilə etmək ittihamı ilə həbs edilib.
O, üç il azadlıqdan məhrumetmə cəzası alıb. Amma 2012-ci ilin sonlarında əfv edilib.
Həmçinin, AİHM Azərbaycan hökumətinə prezidentin işlər idarəsinin keçmiş rəhbəri, 2013-cü ildə qaçaqmalçılıq ittihamı ilə həbs edilmiş Akif Muradverdiyevin işi üzrə müraciət ünvanlayıb.
O, həbsinin və mənzilində axtarış aparılmasının, habelə vəkilsiz dindirilməsinin qanuniliyini mübahisələndirir.
Həmçinin Daşqın Mikayılov, Tural Səfərov və Mənsur Heydərzadənin işləri üzrə kommunikasiya başlayıb.
Şikayətlərdə ərizəçilərin Avropa Konvensiyasının 3 (işgəncələrin yolverilməzliyi), 5 (azadlıq və şəxsi toxunulmazlıq hüququ), 6 (ədalətli təhqiqat hüququ) və 8-ci (şəxsi həyata hömrət) maddələrində zəmanət verilmiş hüquqlarının pozulması məsələləri qaldırılır.