Vəkil Fuad Ağayev oktyabrın 20-də 2 saylı Cəzaçəkmə Müəssisəsində ReAL sədri İlqar Məmmədovla görüşüb.
Bu barədə vəkilin özü məlumat verib.
O bildirib ki, İlqar Məmmədov müəssisə rəhbərliyi tərəfindən yoxlamaya məruz qaldığından görüş bir az gec baş tutub: “İlqar Məmmədov dedi ki, bu günkü tərzdə yoxlama ilə o, 2015-ci ilin oktyabrında qarşılaşmışdı, sonra da onu müəssisənin vəzifəli şəxsləri döymüşdülər. O, bu gün baş verənləri xoşagəlməyən hərəkətlər sayır”.
Vəkil İlqar Məmmədovun səhhətinin normal olduğunu deyib.
İlqar Məmmədov 2013-cü ildə həbs edilib. O, həmin ilin 23-24 yanvarında İsmayıllı şəhərində baş vermiş iğtişaşlarla əlaqədar həbs edilib. Sakitlik bərpa edildikdən sonra İsmayıllıya getməsinə baxmayaraq, Məmmədov kütləvi iğtişaşlarda, polisə müqavimət göstərməkdə ittiham edilib və 7 il müddətinə azadlıqdan məhrum olunub. Onunla birgə Müsavat Partiyasının başqan müavini Tofiq Yaqublu da həbs edilib. O, 2016-cı ildə prezidentin sərəncamı ilə əfv olunub.
2014-cü ilin mayında Avropa İnsan Hüquqları Məhkəməsi (AİHM) İlqar Məmmədovun həbsi və həbsxanada saxlanması ilə Avropa İnsan Hüquqları Konvensiyasının bir çox müddəalarını, o cümlədən azadlıq və şəxsi toxunulmazlıq hüququ, ədalətli məhkəmə hüququ və təqsirsizlik prezumpsiyası prinsipi haqqında 5.1, 5.4 və 6.2-ci maddələrininin pozduğunu tanıyıb. Məhkəmə İlqar Məmmədovun hər hansı dəlil olmadan saxlandığı qənaətinə gəlib.
Avropa Şurası (AŞ) Nazirlər Komitəsi dəfələrlə Azərbaycan hakimiyyətini AİHM-nin Məmmədovun işi üzrə qərarını icra etməyə çağırıb. Oktyabrın 25-də AŞ Nazirlər Komitəsi Azərbaycan barəsində Avropa Konvensiyasının AİHM-nin qərarlarını yerinə yetirməyən ölkəyə qarşı məsuliyyət tədbirlərinin tətbiqini nəzərdə tutan 46-cı maddəsinin tətbiq edilməsi haqqında məsələyə baxacaq.
Azərbaycan rəsmiləri İlqar Məmmədovu siyasi məhbus hesab etmir və bu tələbi qərəzli adlandırırlar.