Vladimir Putinin prezidentliyə qayıdışına etiraz edən minlərlə rus Moskvanın mərkəzində əl-ələ verərək canlı zəncir yaradıblar.
Etirazçılar Moskvanın 16 kilometr uzunluqdakı Bağ Çevrəsi Yolu boyunca yan-yana düzülərək müxalifətin simvoluna çevrilmiş ağ bantlar geyiblər.
2000-08-ci illər arasında prezident olmuş Putin sonradan baş nazir oldu. Ötən sentyabrda o, hazırkı prezident Dmitri Medvedevlə yerini dəyişərək martın 4-də keçiriləcək prezident seçkilərinə namizədliyini irəli sürdü.
Bağ Çevrəsi ötən iki bazar günlərində müxalifətin kütləvi aksiya məkanı olub.