"Qurban Qurbanovun futbol üzrə milli komandanın baş məşqçiliyindən ayrılması kifayət qədər düşündürücüdür".
Bunu qol.az sayının rəhbəri Aydın Bağırov bildirib. Onun sözlərinə görə, Qurban Qurbanov qədər bu postda B.Forqtsa altı il, Xorvatiyadan olan baş məşqçi R.Prosineçkiyə isə iki il imkan yaradılıb. 2017-ci ildə Azərbaycan futbolunda əsas sükan arxasına keçən Qurban Qurbanovla isə bir il sonra yollar ayrılıb.
Aydın Bağırov iddia edir ki, Qurban Qurbanov yığma komandanın baş məşqçiliyindən istefa vermək fikrində olmayıb: "Bu hadisədən 3-4 gün öncə Qurban Qurbanov Avropa Çempionatının seçmə oyunları ilə bağlı püşkatma mərasimində iştirak edib, əgər yığma komandanın baş məşqçiliyini tərk etmək fikri olsaydı, bu mərasimə getməməli idi".
Qarabağ komandası
O hesab edir ki, Qurban Qurbanovun yığma komandanın baş məşqçiliyi vəzifəsindən getməsində uğursuz nəticələrin təsiri 50 faizdir: "Qalan 50 faiz isə tərəflər arasında olan fikir ayrılıqlarından irəli gələn məsələdir. Bu, gizlin deyildi. Amma rəsmi olaraq buna əsas kimi uğursuz nəticələri, iki komandanın baş məşqçisi olmasını göstərirlər. Görünən bu oldu ki, Azərbaycan Futbol Federasiyaları Assosiasiyasının (AFFA) İcraiyyə Komitəsi Q.Qurbanova yetərli dərəcədə dəstək vermədi".
Qurban Qurbanov 10 ildir "Qarabağ" futbol klubunun baş məşqçisidir.
2017-ci ilin noyabrında yığma komanda da ona etibar edilmişdi.
SEE ALSO: Qurban Qurbanov millidən ayrıldıAncaq Qurban Qurbanov "Qarabağ" klubunda Azərbaycan futbolunda tarixi nəticələrə nail olsa da, (Azərbaycan futbolunda ilk dəfə UEFA Çempionlar Liqasının qrupuna yüksəlmək) milli komandada UEFA Millətlər Liqasında təmsil olunduğu qrupdan çıxa bilməyib. Həmin qrupda Azərbaycandan başqa, Malta, Farer adaları və Kosovo millisi təmsil olunurdu.
2018-ci il dekabrın 8-də o, AFFA İcraiyyə Komitəsinin iclasında milli yığma komandanın baş məşqçisi vəzifəsindən kənarlaşıb. Qurban Qurbanov həmin qərardan sonra mətbuata açıqlamasında bunları demişdi: "Klub və millidə çalışmağımın səhv olduğu bildirildi. Çalışdım ki, vicdanla işimi görüm. Məşqçi işi elədir ki, hər zaman çamadanın yanında olmalıdır. Altı illik müqavilə bağlasaq da, əməkdaşlıq qısa çəkdi. Mən millini "Qarabağ"dan ayırmadım. Hər şey qarşılıqlı oldu. Nə göndərildim, nə istefa verdim...."
AzadlıqRadiosu