Müxalifətçinin 15 yaşlı oğlu adam öldürmədə təqsirli bilinib

Lənkəranda Ağır Cinayətlərə dair İşlər üzrə Məhkəmədə Xamməd Nuriyevin sədrliyi ilə qətl törətməkdə ittiham olunan 15 yaşlı Vasif Mirələmov barəsində hökm oxunub.
Məhkəmə onu 120.1-ci (qəsdən adam öldürmə) maddə ilə təqsirli bilib və 8 il müddətinə azadlıqdan məhrum edib. Bu barədə Amerikanın Səsi radiosuna Vasif Mirələmovun atası AXCP Cəlilabad rayon təşkilatının sədri Təzəxan Mirələmli bildirib.
Cəlilabad rayon 7 saylı məktəbin 8-ci sinif şagirdi Vasif Mirələmov həmin məktəbin 10-cu sinif şagirdi Cavanşir Həsənovu qətlə yetirməkdə təqsirli bilinir. Hadisə 2011-ci il aprelin 5-də baş verib. Məktəbin bir qrup şagirdi Vasif Mirələmovu atası müxalifətin mitinqində iştirak etdiyinə görə ələ salıblar. O isə bıçaqla Cavanşir Həsənovu qətlə yetirib. Vasif Mirələmov təqsirini qismən etiraf edib.
Prosesdə yeniyetmənin qanuni maraqlarını atası təmsil edib. O bildirib ki, məhkəmə ittiham tərəfin mənafeyini müdafiə edib və hökm faktiki olaraq ittiham aktının mətnini təkrarlayıb.
Hakim Mirələmovun 8 il müddətinə azadlıqdan məhrum edilməsi haqqında qərar çıxarıb, baxmayaraq ki, bu maddə ilə minimal cəza 7 il həbsdir.
Məhkəmə təqsirləndirilən şəxsin yaşını və onun cinayətə təşviq edildiyini nəzərə almayıb. Prokuror məhkəmədən yeniyetməni 10 il müddətinə həbs etməyi istəmişdi.
Təzəxan Mirələmli bildirib ki, məhkəmənin hökmündən Apellyasiya Məhkəməsinə şikayət veriləcək.