ABŞ Dövlət katibi Con Kerri Rusiyanı Ukraynanın şərqində Malayziya hava yollarına məxsus təyyarənin düşdüyü ərazidə təhlükəsizliyin təmin edilməsi işində separatçılarla öz nüfuzundan istifadə etməyə çağırıb. Lakin o bildirib ki, Rusiyanın Ukraynanın şərqində zorakılıq və qantökməyə son qoymaq istədiyinə işarə yoxdur.
Vaşinqtonda Ukraynanın Xarici İşlər naziri Pavlo Klimkinlə birgə mətbuat konfransında danışan Con Kerri separatçıları təyyarənin düşdüyü əraziyə getmək imkanının qarşısını alaraq, insanlıq ləyaqətinə hörmətsizlik göstərməkdə ittiham edib.
ABŞ Dövlət katibi eyni zamanda, Ukrayna ərazisinin Rusiyadan raket və artilleriya atəşlərinə tutulduğuna dair aydın dəlil olduğunu deyib.
Öz növbəsində, cənab Klimkin Ukraynanın ərazi bütövlüyünün bərpası məqsədilə Rusiya tərəfdarı separatçılarla atəşkəsin əldə edilməsinin əhəmiyyətini vurğulayıb.