Formula-1 yarışının Azərbaycan Qran Prisi 2024-cü ilə qədər keçiriləcək.
Bu barədə Bakı Şəhər Halqası (BŞH) Əməliyyat Şirkəti məlumat verib.
Məlumata görə, bu, ötən il koronavirus pandemiyası səbəbindən "Formula 1 Azərbaycan Qran Prisi 2020"-nin ləğv olunması ilə bağlıdır.
"Müqavilə 2023-cü ilə qədər bağlanmışdı. Lakin ötən il Azərbaycan Qran Prisi keçirilmədi deyə, müqavilədə dəyişiklik oldu və müddət 2024-cü ilə qədər uzadıldı," məlumatda qeyd edilir.
Şirkət həmçinin qeyd edib ki, sosial mediada bu il Formula-1 Azərbaycan Qran Prinin keçirilməməsi ilə bağlı məlumatlar həqiqəti əks etdirmir.
"4-6 iyun tarixlərində Bakıda yarış baş tutacaq".
Azərbaycanda Formula-1 yarışları 2016-cı ildən keçirilir.
Rəsmilər Azərbaycanda Formula-1 yarışlarına ümumilikdə çəkilən xərcləri açıqlamır.