İsrail müalicə üçün Qəzzaya qaytarılan onlarla fələstinlinin azad edilməsi planı çərçivəsində Qəzzanın əsas xəstəxanasının rəhbərini də bazar ertəsi azad edib.
Məhəmməd Əbu Selmiyə noyabr ayından həbsdə idi. O, İsrail qüvvələrinin HƏMAS-ın xəstəxanadan komanda mərkəzi kimi istifadə etdiyini iddia edərək, orada reyd keçirdiyi Qəzzanın Şifa xəstəxanasına rəhbərlik edib.
Xəstəxana rəsmiləri iddiaları rədd edərək, İsraili xəstələrlə yanaşı, sığınacaq axtarmaq üçün xəstəxanaya gələn məcburi köçkün fələstinliləri təhlükə altına almaqda günahlandırıb.
İsrailin ifrat sağçı milli təhlükəsizlik naziri İtamar Ben Qvir X səhifəsində Əbu Selmiyanın azad edilməsini tənqid edərək, bu addımın "təhlükəsizlikdən imtina" olduğunu deyib.
İsrail hərbçiləri militantların Qəzzanın cənubundakı Xan Yunis şəhərindən sərhəddə yerləşən ərazilərə 20 mərmi atmasına cavab olaraq hücumlar həyata keçirdiklərini bildirib.
Hərbi qüvvələrin bildirdiyinə görə, mərmilərin bir qismi ələ keçirilib, digərləri isə İsrailin cənubuna düşüb.
İsrailin hava zərbələri həmçinin Livanın cənubundakı bir neçə kənddə Hizbullah militantlarını hədəfə alıb.
İsrailin Hizbullah qrupuna qarşı daha geniş əməliyyatlara başlaması ilə bölgədə genişlənmiş münaqişə perspektivi ABŞ və digər ölkələrin eskalasiyanın qarşısını almaq zərurəti ilə bağlı xəbərdarlıqlarına səbəb olub.
İsrailin baş naziri Benyamin Netanyahu bazar günü "qələbənin əvəzi olmadığına" dair verdiyi sözünü bir daha təsdiqləyərək, Nazirlər Kabinetinə İsrailin Qəzzada HƏMAS-a qarşı müharibənin militantlar məğlub olana və HƏMAS-ın saxladığı 120 girov ölü və ya diri olaraq geri qaytarılana qədər davam edəcəyini deyib.
O, təxminən doqquz aydır davam edən müharibənin HƏMAS-ın "artıq İsrail üçün təhlükə yaratmadığı" da daxil olmakla "bütün məqsədlərimizə çatana qədər" davam edəcəyini deyib.
HƏMAS-ın yüksək rütbəli rəsmisi Usama Həmdan şənbə günü Beyrutda keçirdiyi mətbuat konfransında "aqressiya ilə bağlı danışıqların sonunda heç bir real irəliləyiş yoxdur" deyib.
Qəzzada müharibə HƏMAS-ın oktyabrın 7-də İsrailə 1200 nəfərin ölümü, 250 nəfərin girov götürülməsi ilə nəticələnən hücumundan sonra başlayıb. İsrailin Qəzzada əks-hücumu nəticəsində 38 minə yaxın fələstinli ölüb.