İranın xarici işlər naziri çərşənbə günü səudiyyəli həmkarı ilə İordaniyada keçirilən konfransdan kənarda söhbət etdiyini bildirib.
Yaxın Şərqin aparıcı şiə və sünni müsəlman gücləri olan Səudiyyə Ərəbistanı və İran Suriya və Yəmən də daxil olmaqla, regiondakı münaqişələrin əks tərəfində olub. İraq keçən ildən bəri Səudiyyə Ərəbistanı və İran rəsmiləri arasında gərginliyi azaltmaq məqsədi ilə beş dəfə görüş keçirib. Sonuncu görüş aprel ayında olub.
İranın xarici işlər naziri Hüseyin Əmirabdullahian çərşənbə günü Tvitter hesabında ərəb dilində Səudiyyə Ərəbistanından olan həmkarı şahzadə Feysəl Bin Fərhan Əl-Səudu İordaniya konfransı çərçivəsində "dostluq danışıqları" apardığı bir neçə xarici işlər nazirlərindən biri kimi qeyd edib. "Səudiyyəli həmkarım məni ölkəsinin İranla dialoqu davam etdirməyə hazır olduğuna əmin etdi" deyə, Əmirabdullahian yazıb.
Səudiyyə Ərəbistanı Xarici İşlər Nazirliyi bu barədə şərh verməyib.
İran və Səudiyyə Ərəbistanı arasında gərginlik İranda etirazların başlamasından sonra daha da artıb. Belə ki, İnqilab Keşikçiləri Korpusu Səudiyyə Ərəbistanına öz mediasına nəzarət etməyi əmr edib, İranın kəşfiyyat naziri isə Ər-Riyada Tehranın "strateji səbrini" davam etdirəcəyinə heç bir zəmanət olmadığı barədə xəbərdarlıq edib.
İran öz xarici düşmənlərini bütün təbəqələrdən olan iranlıların iştirak etdiyi etirazları qızışdırmaqda ittiham edib.
İranın İnqilab Keşikçiləri Korpusunun generalı Esmail Qaani çərşənbə axşamı ABŞ-ın uzun müddətdir müttəfiqi olan Səudiyyə Ərəbistanını "düşmən olmağa layiq olmayan pislik" adlandırıb.
İranın mübahisəli nüvə proqramı da gərginliyi artırıb. Tehranla dünya qüdrətləri arasında İranın 2015-ci ildə imzaladığı nüvə sazişinin bərpasına dair danışıqlar sentyabr ayından bəri dalana dirənib.
Şahzadə Faysal dekabrın əvvəlində bildirib ki, əlamətlər "təəssüf ki, çox da müsbət deyil" və Tehran nüvə silahı əldə edərsə, Körfəz ərəb dövlətləri təhlükəsizliklərini gücləndirmək üçün hərəkətə keçəcək.