2022-ci ildə İslam Respublikası rəhbərliyinə qarşı keçirilən ümummilli "Qadın, Həyat, Azadlıq" etirazları zamanı bir polis məmurunu öldürdüyü ittihamı ilə edam cəzasına məhkum edilən Məhəmməd Qobadlu psixi vəziyyəti ilə bağlı diaqnoz qoyulduqdan sonra hüquq-müdafiə qruplarının prosesi dayandırmaq çağırışlarına baxmayaraq, edam edilib.
23 yaşlı Qobadlu baş örtüyünü pozduğu iddiası ilə Tehranın əxlaq polisinin nəzarətində olan Məhsa Əmininin ölümündən sonra başlayan etiraz aksiyaları zamanı həbs edilib. O, polis məmurlarının üzərinə getməkdə, bir nəfəri öldürməkdə və beş nəfəri yaralamaqda ittiham olunub.
Qobadlunun edamından əvvəl onun vəkili Əmir Rəisian bildirib ki, müvəkkilinin edamına "hüquqi icazə yoxdur". O, Ali Məhkəmənin onun ölüm hökmünü ləğv etdiyini və həkimlərin Qobadluya bipolyar diaqnozu qoyduğunu və işin yenidən baxılması üçün yeni yurisdiksiyaya göndərildiyini bildirib.
"Məhəmməd Qobadlunun cəzası icra olunduğuna görə onun artıq məhkəməyə müraciət etmək imkanı yoxdur və bu, şübhəsiz ki, qətl hesab edilə bilər", Rəisian X səhifəsində yazıb.
Ədliyyə orqanları tərəfindən idarə olunan Mizan xəbər agentliyi Rəisianın şərhlərini rədd edərək, Ali Məhkəmənin keçən il "edamı dayandırmaq" qərarı verdiyini və tibb mütəxəssislərinin Qobadlunun iddia edilən cinayəti törətdiyi zaman psixi sağlamlıq vəziyyətindən əziyyət çəkmədiyini müəyyən etdiyini bildirib.
Bununla belə, keçən il Ali Məhkəmənin sözçüsünün İran dövlət mediasına bildirdiyinə görə, həkimlər Qobadlunun əslində bipolyardan əziyyət çəkdiyini müəyyən etdikdən sonra məhkəmə ölüm hökmünü "ləğv edib".
Qobadlunun anası Məsumə Əhməidi keçən il bir videoda oğlunun etirazlardan əvvəl dərmanlarının qəbulunu dayandırdığını deyib.
Edamdan bir neçə saat əvvəl Amnesty International Təşkilatı onun psixi sağlamlığındakı vəziyyətini vurğulayaraq, İran hakimiyyətini Qobadlunun "qanunsuz edamını" dayandırmağa çağırıb.
İnsan haqları qrupu Qobadluya qarşı işin "gizli və işgəncə altında əldə edilmiş etiraflara əsaslandığını" təkid edib.